დაავადებათა კონტროლის ცენტრის ინფორმაციით, მაიმუნის ყვავილის ვირუსი საქართველოშიც დაფიქსირდა. სავარაუდოდ, ეს ის შემთხვევაა, რომელსაც უწყება აქამდე იკვლევდა.

დეტალები: NCDC-ის ცნობით, პაციენტს ვირუსული დაავადების მსუბუქი ფორმა აღენიშნებოდა, შესაბამისი მკურნალობის შემდეგ კი სამედიცინო დაწესებულებიდან მალევე გაეწერა.

  • მათივე თქმით, პაციენტს აქვს ევროპაში მოგზაურობის ისტორია.
  • "მიმდინარეობდა კონტაქტებზე დაკვირვება და არცერთ შემთხვევაში კლინიკური ნიშნები არ გამოვლინდა".

რატომ არის მნიშვნელოვანი: მაისის დასაწყისში ევროპაში მაიმუნის ყვავილის დაფიქსირების და შემთხვევათა ზრდის ფონზე გაჩნდა კითხვა, ვდგავართ თუ არა მომავალი პანდემიის საფრთხის წინაშე. მკვლევართა ნაწილი პანდემიას სრულად ვერ გამორიცხავს, თუმცა ისინი არ მიიჩნევენ, რომ ეს მოსალოდნელი სცენარია.

  • ჯანდაცვის მსოფლიო ორგანიზაციის 14 ივნისის მონაცემებით, მაიმუნის ყვავილის 1 800-ზე მეტი შემთხვევაა დადასტურებული.
  • WHO შეფასებით, გამომდინარე იქიდან, რომ მაიმუნის ყვავილის შემთხვევები და კლასტერები ანგარიშგებულია, როგორც ენდემურ, ისე არაენდემურ ქვეყნებში, გლობალურ დონეზე საზოგადოებრივი ჯანდაცვის რისკი საშუალოა.

რა არის მაიმუნის ყვავილი: მაიმუნის ყვავილი ზოონოზური დაავადებაა, რომელიც ადამიანს უმეტესად გადაეცემა მღრნელებისა და პრიმატებისგან.

  • აშშ-ის დაავადებათა კონტროლის ცენტრის (CDC) განმარტებით, მაიმუნის ყვავილის "ადამიანიდან ადამიანზე გადაცემა ძირითადად ჰაერწვეოვანი გზით ხდება. რესპირატორული წვეთები, როგორც წესი, რამდენიმე ფუტზე მეტს ვერ გადაადგილდება, ამიტომ ინფიცირებისთვის პირისპირ, ხანგრძლივი კონტაქტია საჭირო".

რა სიმპტომები ახასიათებს: ბრიტანეთის ჯანდაცვის უწყების ცნობით, მაიმუნის ყვავილის პირველი სიმპტომებია: ცხელება, თავის ტკივილი, კუნთების ტკივილი, ზურგის ტკივილი, ლიმფური კვანძების შეშუპება, შემცივნება და დაღლილობა.

  • NCDC-ის განმარტებით, დაინფიცირებისას კლინიკური გამოვლინება ყვავილით დაინფიცირების მსგავსია, თუმცა მიმდინარეობა ძირითადად მსუბუქია. ინკუბაციის პერიოდი 5-დან 21-დღემდეა, ძირითადად 7-14 დღის ფარგლებში გამოვლენით.
  • 5 დღის ფარგლებში იწყებს გამოვლენას გრიპისთვის დამახასიათებელი სიმპტომებით. სიმპტომების დაწყებიდან 1-3 დღეში იწყება გამონაყარი, საწყის ეტაპზე სახეზე, რომელიც შემდეგ ვრცელდება მთელს სხეულზე, უპირატესად კიდურებზე. დამახასიათებელია გამონაყარი ხელის გულებსა და ფეხის ძირებზე.

არსებობს თუ არა ვაქცინა: ანტივირუსული წამალი tecovirimat (Tpoxx) ნებადართულია ევროპაში, მაიმუნის ყვავილის სამკურნალოდ.

  • გარდა ამისა, არსებობს ვაქცინა Jynneos (იგივე Imvanex და Imvamune), რომელიც დაშვებულია აშშ-სა და ევროპაში, მაიმუნის ყვავილისა და ყვავილის პრევენციისთვის, 18 წლის ზემოთ ადამიანებისთვის.
  • არსებული ინფორმაციით, მათ ვისაც ბავშვობაში ყვავილის აცრა გაკეთებული გვაქვს, მაიმუნის ყვავილის ვირუსის წინააღმდეგ გარკვეული იმუნიტეტი უნდა გვქონდეს.

არქივიდან: მაიმუნის ყვავილი პირველად ადამიანს დაუდასტურდა 1970 წელს, კონგოს დემოკრატიულ რესპუბლიკაში. მეცნიერებს ამ პერიოდის მანძილზე შესაძლებლობა ჰქონდათ შეესწავლათ ვირუსის ბუნება.

  • NCDC-ის ინფორმაციით, გამოვლენილია მაიმუნის ყვავილის ორი შტამი: დასავლეთ აფრიკული შტამი, რომელიც ასოცირებულია მსუბუქ კლინიკურ მიმდინარეობასთან და ლეტალობის მაჩვენებელი 1%-ის ფარგლებშია;
  • კონგოს აუზის (ცენტრალური აფრიკა) შტამი, რომელსაც ახასიათებს ადამიანიდან-ადამიანზე გადაცემის მაღალი უნარი, ავადობის გაზრდილი მაჩვენებელი და ლეტალობის მაჩვენებელი 10%-ის ფარგლებში.
  • მაიმუნის ყვავილის ლეტალობის საშუალო მაჩვენებელი 3-6%-ია.

გაიგე მეტი: