ცოტა ხნის წინ ოფიციალურად დადასტურდა, რომ ერთ-ერთი ყველაზე პოპულარული სამხრეთკორეული სერიალი კალმარის თამაში მეორე სეზონით დაბრუნდება. თუმცა სიახლეები ამით არ მთავრდება: ნეტფლიქსი კალმარის თამაშის მიხედვით რეალითი შოუს იღებს.

ახალ რეალითი შოუში ერთმანეთს 456 ადამიანი $4,56 მილიონის მოსაგებად დაუპირისპირდება. მონაწილეები ერთმანეთს სერიალით შთაგონებულ და სხვა თამაშებში შეეჯიბრებიან. რა თქმა უნდა, აღნიშნული თამაშები სასიკვდილო არ იქნება.

ნეტფლიქსი რეალითი შოუსთვის მონაწილეებს მსოფლიოს გარშემო ეძებს. კანდიდატი, სულ მცირე, 21 წლის უნდა იყოს, ინგლისურად უნდა საუბრობდეს და 2023 წლის დასაწყისში 4 კვირა გადაღებებს დაუთმოს.

რეალითი შოუში 456 მონაწილე სიმბოლურია. სერიალში ფულის მოსაგებად ერთმანეთს სწორედ ამდენი ადამიანი უპირისპირდება, თანაც კალმარის თამაშის მთავარი პერსონაჟი გი-ჰუნი 456-ე ნომერია.

კალმარის თამაში ნეტფლიქსის ერთ-ერთი ყველაზე წარმატებული პროექტია. სერიალმა პრემიერის თვეში რეკორდიც დაამყარა და გამოსვლიდან 25 დღეში 111 მილიონი ნახვით ნეტფლიქსის ყველაზე პოპულარული სერიალი გახდა. გასაკვირი არაა, რომ მეორე სეზონის გამოსვლას მაყურებელი სულმოუთქმელად ელის.

"კალმარის თამაშის პირველი სეზონის თქვენამდე მოსატანად 12 წელი დამჭირდა. თუმცა კალმარის თამაშს 12 დღე დასჭირდა იმისთვის, რომ ნეტფლიქსის ყველაზე პოპულარული სერიალი გამხდარიყო", — ასე დააანონსა სერიალის შექმნელმა ჰვან დონ-ჰიუკმა ახალი სეზონი.

ამავე თემაზე: