საქართველოს პრემიერ-მინისტრი, გიორგი კვირიკაშვილი ამერიკის შეერთებული შტატების პრეზიდენტს, დონალდ ტრამპსა და ვიცე-პრეზიდენტს, მაიკ პენსს შეხვდა. ვაშინგტონში შეხვედრის დეტალებზე კვირიკაშვილმა ჟურნალისტებთან ისაუბრა.

კვირიკაშვილის თქმით, მაიკ პენსსთან შეხვედრისას ამერიკის შეერთებული შტატების თანამშრომლობასთან პარტნიორობის გაღრმავების გარანტიები მიიღო.

"ეს ძალიან პოზიტიური შეხვედრა იყო და საუბარი ყველა მიმართულებით ურთიერთობებზე გვქონდა. ეს არის თავდაცვისა და უსაფრთხოების მიმართულება, კულტურული ურთიერთობები, დემოკრატიული ინსტიტუციების განვითარებაში მომავალი მხარდაჭერა ამერიკის შეერთებული შტატების, ეს არის ეკონომიკური ურთიერთობების გაღრმავება," - აღნიშნა საქართველოს პრემიერ-მინისტრმა.

მისივე შეფასებით, დოლანდ ტრამპმაც საქართველოს მხარდასაჭერი გზავნილები გააჟღერა.

"ვფიქრობთ, რომ მთლიანობაში ეს უმნიშვნელოვანესია საქართველოს მომავალი განვითარებისთვის, სტაბილურობისთვის ჩვენს ქვეყანაში. ამერიკის შეერთებული შტატები, როგორც საქართველოს მთავარი სტრატეგიული პარტნიორი გააგრძელებს მნიშვნელოვან მხარდაჭერას და ეს ურთიერთობები მნიშვნელოვნად გაღრმავდება მომავალში," - თქვა კვირიკაშვილმა.