ოპოზიციონერი დეპუტატმა, თამარ კორძაიამ ირაკლი ღარიბაშვილს ჰკითხა, თუ რატომ არ ჩადის პირადად უკრაინაში, განსაკუთრებით იმ ფონზე, როდესაც იმ ქვეყნის პრემიერმინისტრია, რომლის ტერიტორიებიც რუსეთის მიერაა ოკუპირებული.

"თქვენ პერსონალურად, იმ სახელმწიფოს პრემიერმინისტრი, რომლის 20% ოკუპირებულია, რატომ არ ჩადიხართ პერსონალურად უკრაინაში, თუ თქვენი ჩასვლა ომს გამოიწვევს საქართველოში, კონკრეტული პასუხი მინდა — თქვენი ჩასვლა უკრაინაში და პერსონალური მხარდაჭერა გამოიწვევს თუ არა ომს საქართველოში. იმიტომ, რომ თქვენი უმრავლესობის წარმომადგენლები დაახლოებით ამას ლაპარაკობენ აქ", — თქვა მან.

გარდა ამისა, კორძაია დაინტერესდა, თუ რა პასუხისმგებლობას აიღებს ღარიბაშვილი საკუთარ თავზე, თუ საქართველო ევროკავშირის კანდიდატის სტატუსს ვერ მიიღებს.

დღეს პლენარულ სხდომაზე პარლამენტის რეგლამენტის 149-ე მუხლის მე-5 პუნქტის თანახმად ინტერპელაციის პროცედურა იმართება. ინტერპელაციის წესით დეპუტატების შეკითხვებს უკვე უპასუხა საგარეო საქმეთა მინისტრმა, ილია დარჩიაშვილმა.

ამ წუთებში დეპუტატების კითხვებს პასუხობს საქართველოს პრემიერმინისტრი, ირაკლი ღარიბაშვილი. მოგვიანებით კი პარლამენტის წინაშე ეკონომიკის მინისტრი, ლევან დავითაშვილი და იუსტიციის მინისტრი, რატი ბრეგაძე წარსდგებიან.