სამართლიანი არჩევნების და დემოკრატიის საერთაშორისო საზოგადოების (ISFED) კონსულტანტმა საარჩევნო და სამართლებრივ საკითხებში ნინო ლომჯარიამ გადაცემა არჩევანში სტუმრობისას რუსთავი 2-ის გარშემო მიმდინარე პროცესები შეაფასა როგორც პოლიტიკურად მოტივირებული დავა, რომელიც საერთაშორისო ორგანიზაციებს ყურადღების მიღმა არ რჩებათ:

"საკითხი დგას იმასთან დაკავშირებით, ვის შორის არის რეალური დავა. ნათელია, რომ ის ფორმები რაც მიიღო სასამართლოში ამ საქმის განხილვამ, ცალსახად ცხადყოფს რომ ეს არ არის კერძო პირებს შორის, მესაკუთრეებს შორის დავა".

ლომჯარიამ დასძინა, რომ ამ საკითხზე სამოქალაქო სექტორთან ერთად საუბრობენ საერთაშორისო ორგანიზაციებიც:

"ფრიდომ ჰაუსის ანგარიშში საუბარია პირველ ინსტანციაში წარმართულ პროცესებზე, რომელიც ორგანიზაციას კითხვებს უჩენს, იყო თუ არა ეს პროცესები პოლიტიკურად მოტივირებული და პოლიტიკური ზეწოლის ნიშნების შემცველი. ასევე ამერიკის სახელმწიფო დეპარტამენტის ანგარიშში საუბარია იმაზე, რომ სასამართლოს გადაწყვეტილება სარედაქციო პოლიტიკის შეცვლას ემსახურებოდა მიზნად".

ISFED-ის კონსულტანტის თქმით, რუსთავი 2-ის საქმე არის ძალადობა საარჩევნო გარემოში, რომელიც საქართველოს მოქალაქეებს კრიტიკული მედიის ხელმისაწვდომობას უზღუდავს.

ნინო ლომჯარიამ მოსამართლეების დამოკიდებულებაც გააკრიტიკა და თქვა, რომ მთავარია პროცესში მონაწილე მხარეს გაუჩნდეს შთაბეჭდილება, რომ იქ მიმდინარეობს მართლმსაჯულება:

"შესაძლოა ეს მოსამართლეები კვალიფიციურნი არიან, თუმცა მათ მიერ დაჩქარებული ტემპები და ის დამოკიდებულება რასაც ისინი რუსთავი 2-ის მიმართ იჩენენ, მათ დამოუკიდებლობას ეჭვქვეშ აყენებს".

ლომჯარია თვლის, რომ ქვეყნის განვითარება და მომავალი დიდწილადაა დამოკიდებულია რუსთავი 2-ის საქმის მოსამართლეების გადაწყვეტილებაზე და მას სერიოზული შედეგები შეიძლება ჰქონდეს ქვეყანაში მიმდინარე პროცესებზე.