სექსუალურ ძალადობაში ბრალდებული საკრებულოს ყოფილი დეპუტატი ილია ჯიშკარიანი სასამართლომ უდანაშაულოდ ცნო. როგორც მოსამართლემ განმარტა, ეჭვი არ ეპარება, რომ ზოგიერთი ჟურნალისტი შეეცდება ამას პოლიტიკური ელფერი მისცეს, თუმცა ამას უკვე მიეჩვია.

"ეჭვი არ მეპარება, რომ ზოგიერთი ჟურნალისტი შეეცდება ამას მისცეს პოლიტიკური ელფერი, ამას უკვე მივეჩვიე, მაგრამ არაუშავს. როდესაც ადამიანი მართალი ხარ, ამის არ გეშინია. გამამტყუნებელი განაჩენი დგება მაშინ, როდესაც სასამართლოს აქვს გონივრულ ეჭვს მიღმა სტანდარტი, ანუ მტკიცებულებათა საკმაო რაოდენობა, რომლებიც ადასტურებენ ამ ადამიანის ბრალეულობას", — ამბობს მოსამართლე.

თამთა თოდაძემ პროცესის შემდეგ განაცხადა, რომ გადაწყვეტილებას სააპელაციო სასამართლოში გაასაჩივრებს.

"გულწრფელად რომ გითხრათ, ნამდვილად იმედგაცრუებული ვარ იქიდან გამომდინარე, რომ ამდენი მტკიცებულება მოვიტანეთ, მართლა ყველაფერი იყო საქმეში, რას ვეუბნებით სხვა ქალებს?", — თქვა თოდაძემ.

11 სექტემბერს სექსუალურ ძალადობაში დადანაშაულებულ ილია ჯიშკარიანს სასამართლომ 10 ათასი ლარის ოდენობის გირაო შეუფარდა. მასვე საქმეზე დაკითხულ მოწმეებთან ნებართვის გარეშე კომუნიკაცია და დაზარალებულ თამთა თოდაძესთან მიახლოება აეკრძალა.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

2019 წლის 6 ოქტომბერს თოდაძემ მთავარი არხის ეთერში მომხდარზე ღიად ისაუბრა, მეორე დღეს კი პროკურატურასთან მისი მხარდამჭერი აქცია გაიამართა. 8 ოქტომბერს მისმა უფლებადამცველმა პროკურატურას დაზარალებულის სტატუსის მისანიჭებლად ისევ მიმართა, საღამოს კი ცნობილი გახდა, რომ პროკურატურამ ილია ჯიშკარიანს ბრალი წარუდგინა და ქალი დაზარალებულად ცნო.