ქართული ოცნების თავმჯდომარე, ირაკლი კობახიძე დასავლელი პარტნიორების კრიტიკას კვლავ კრიტიკით პასუხობს და აცხადებს, რომ ნაციონალური მოძრაობა, "კრამონები და ფოტიგები" არიან ანტიევროკავშირი. მისი თქმით, ევროპულ ღირებულებებთან მათთან "საერთოდ არ არის ახლოს".

"სად არის უკუსვლა? უკუსვლა არის აღქმებში. ამ აღქმებს ასახელებენ აქ ნაციონალური მოძრაობა და იქ ფონ კრამონები, ფოტიგები და ა.შ. ეს არის რაღაცა კონკრეტული პატარა ჯგუფი და სინამდვილეში კიდევ ერთხელ გავიმეორებ, რომ ზუსტად ესენი არიან ანტიევროკავშირი.

ასეთი ადამიანები, რომლებიც მუდმივად უსამართლობისკენ უბიძგებენ სისტემას, არიან თავისი არსით ანტიევროკავშირი, იმიტომ რომ ევროპული ღირებებული არის ბევრი რამ, მაგრამ მათ შორის ერთ-ერთი უმთავრესი არის სამართლის უზენაესობა და როდესაც 2012 წლიდან მოყოლებული მთავარი რასაც შენ გთხოვენ არის, კანონი არ აღასრულო, ეს არის მათი მთელი ხაზი, ეს ნიშნავს იმას, რომ ევროპული ღირებულებები მათთან საერთოდ არ არის ახლოს. ამას აქვს ერთადერთი მიზეზი — ისინი არიან კრიმინალების მფარველები, კონკრეტული კრიმინალური პოლიტიკური ძალის მფარველები", — ამბობს ის საზოგადოებრივი არხის ეთერში.

ამ კომენტარის გაკეთებამდე კობახიძემ თქვა, რომ ევროპარლამენტარ ვიოლა ფონ კრამონზე სერიოზულ კომენტარს საერთოდ არ გააკეთებდა კონკრეტული მიზეზების, მათ შორის პირადი ფაქტორების გამო.

ვიოლა ფონ კრამონი, ანა ფოტიგა და იან კელი ხშირად აკრიტიკებენ ხელისუფლებას, რაც მმართველ გუნდს არ მოსწონს. შესაბამისად, ისინი მუდმივად აკრიტიკებენ მათ და ენმ-სთან მეგობრობას, მიკერძოებულობას აბრალებენ.

გუშინ კულტურის მინისტრმა, თეა წულუკიანმა დასავლელი პარტნიორების განცხადებებს, ტრადიციულად, კრიტიკით უპასუხა. იმედის ეთერში საუბრისას მან განსაკუთრებული ყურადღება დაუთმო აშშ-ის ყოფილ ელჩს, იან კელისა და ევროპარლამენტარებს, ვიოლა ფონ კრამონსა და ანა ფოტიგას.

ევროპარლამენტარმა, ვიოლა ფონ კრამონმა განაცხადა, რომ წულუკიანის შეფასებები იმედგაცრუებას იწვევს და პუტინის საქციელს ჰგავს. მანვე თქვა, რომ ქართული ოცნების დეზინფორმაცია აღწევს კრემლის დონემდე.

ამავე თემაზე: