კულტურის მინისტრმა, თეა წულუკიანმა დასავლელი პარტნიორების განცხადებებს, ტრადიციულად, კრიტიკით უპასუხა. იმედის ეთერში საუბრისას მან განსაკუთრებული ყურადღება დაუთმო აშშ-ის ყოფილ ელჩს, იან კელისა და ევროპარლამენტარებს, ვიოლა ფონ კრამონსა და ანა ფოტიგას.

ნიკა გვარამიას საქმის განხილვისას წულუკიანი ამტკიცებდა, თითქოს საქართველოს რეალურად დასავლეთი კი არა, მხოლოდ მცირე ჯგუფი აკრიტიკებს. მინისტრის აზრით, ასეთი 10-12 ადამიანი ნაციონალური მოძრაობის მეგობრია და "ისინი არიან უცხოელი ნაცები".

"არ შეიძლება ერთმა სისხლის სამართლის საქმემ ქართველი ერის ევროპული არჩევანი შეცვალოს, ან ვინმეს მისცეს იმის უფლება, რომ ესოდენ მნიშვნელოვან საქმედ აქციოს. თუმცა, არიან უცხოელების ჯგუფი, რომლებსაც ეს აღელვებთ და ეს ჯგუფი ცდილობს, ქართველ ხალხს მიყიდიოს თავისი თავი, თითქოს ისინი არიან თვით დასავლეთი, თვით ევროპა და თუკი ისინი რაღაცით არიან უკმაყოფილოები, ეს ნიშნავს, რომ დასავლეთ ევროპა, ჩრდილოატლანტიკური ალიანსი და ფრანგები, პოლონელები, გერმანელები, ყველა გვერჩის ერთიანად", — განცხადა მან.

წულუკიანის განცხადება ტრადიციულად ირონიული ქვეტექსტის იყო. ის ამტკიცებდა, რომ იან კელის საქართველო არ უყვარს, კრამონს კი სხვა საქმე არ აქვს.

"ეს არის უცხოელების პატარა ჯგუფში, ამ უცხოელ ჯგუფში მე ვგულისხმობ ლამის ქართველ პოლიტიკოსად ქცეულ გერმანელ პოლიტიკოსს, ქალბატონ ვიოლა ფონ კრამონს, რომელსაც, მგონი, თავის საარჩევნო ოლქში აღარ აქვს იმდენი საქმე და პირდაპირ ერევა ქართულ პოლიტიკაში — ხან ვის დაუქნევს თითს, ხან ვის და ჰგონია, რომ მას ამის უფლება აქვს.

ასევე, არის ბატონი იან კელი. ერთი იან კელის წონის ცრემლები აქვს ერთ ქართველ დედას, ალბათ, ჩუმად დაღვრილი, როდესაც შვილებს ევროპული და დასავლური არჩევანის დასაცავად უშვებდა სხვადასხვა ბრძოლაში", — განაცხადა მან.

მინისტრის აზრით, როცა ამ ჯგუფს "რაღაცას ეტყვიან", ისინი მშვიდდებიან და "აღარ კადრულობენ უკადრებელს". მისივე თქმით, ამ ჯგუფშია ანა ფოტიგაც, რომელიც საყვედურს პასუხობს იმით, რომ უყვარს საქართველო.

"გააჩნია საქართველოში ვინ რას გულისხმობს. ასე რუსიც გულისხმობდა საქართველოში ხაჭაპურს, მაგრამ საქართველო მხოლოდ ხაჭაპური, ლამაზი სვანეთი და კოშკები არ არის. საქართველო არის ერი, პირველ რიგში, რომელსაც პატივი უნდა სცე", — განაცხადა წულუკიანმა.

მისივე აზრით, თავად არიან დამნაშავეები, თუ "რომელიმე პატარა ჯგუფი" რაიმეს "უსამართლოდ გაუბედავს". წულუკიანი ამტკიცებს, თითქოს ამ ხალხს აქვს მიზანი ენმ-სთან ერთად "გადააყირავონ მთავრობა".

"მე ყოველთვის მიფიქრია, რომ თუკი უსამართლოდ რომელიმე ეს პატარა ჯგუფი უცხოელების რამეს გაგვიბედავდა, ამაში ჩვენც ვართ დამნაშავე. იმიტომ, რომ 2021-2022 წლამდე არ გავბედეთ მათთვის გვეთქვა — იცი რა, აქ დამოუკიდებელი სახელმწიფოა, ჩვენ ამ სახელმწიფოებრიობაში ათადან და ბაბადან დღემდე სისხლი ჩავღვარეთ, დაწყებული პატარა გოგოებიდან, დამთავრებული დიდი კაცებით. და თუ შეიძლება ცოტა დამშვიდდით, იმიტომ, რომ თქვენ ელაპარაკებით სუვერენულ სახელმწიფოს", — აცხადებს ის.

ვიოლა ფონ კრამონი და იან კელი ხშირად აკრიტიკებს ხელისუფლებას, რაც მმართველ გუნდს არ მოსწონს. შესაბამისად, ისინი მუდმივად აკრიტიკებენ მათ და ენმ-სთან მეგობრობას, მიკერძოებულობას აბრალებენ.