ქართული ოცნების დეპუტატი, მიხეილ სარჯველაძე აცხადებს, რომ თუ საჭიროება დადგება და ვინმე ბიძინა ივანიშვილის მხარდამჭერ აქციას დააორგანიზებს, "სიამოვნებით" შეუერთდება. ასე უპასუხა სარჯველაძემ პალიტრანიუსის ჟურნალისტის კითხვას: დღეს ითქვა, რომ შესაძლოა, ბიძინა ივანიშვილის მხარდამჭერი აქცია გაიმართოს, რამდენად შეიძლება იგივე ქართული ოცნება იყოს ერთ-ერთი ორგანიზატორი, ვინც ივანიშვილის მხარდამჭერ აქციას და მანიფესტაციას გამართავს, თუკი ივანიშვილს დაცვა დასჭირდება?

"არ მსმენია ამის შესახებ. [...] რამაც განაპირობა ასეთი დამთხვევები, შეიძლება, ასეთი ფაქტორების დასაცავად ღირდეს, ამ შემთხვევაში, იმის ჩვენება, როგორია განწყობა და დამოკიდებულება ქართველი ხალხის და რატომაც არა? მე პირადად, სიმართლე გითხრათ, ასეთი აქციის გამართვის შემთხვევაში, თუ ასეთ საჭიროებას ვინმე დაინახავს და დააორგანიზებს, რასაკვირველია, სიამოვნებით შევუერთდები.

ბუნებრივია ეს აბსოლუტურად, იმიტომ, რომ მე მოქალაქე ვარ ამ ქვეყნის. იმიტომ, რომ მე ვგრძნობ და მეც მაქვს ეს განწყობა, რომ არსებობენ ძალები, რომლებსაც სურთ, საქართველო იყოს პაიკი. მე ასე არ ვხედავ ჩემს ქვეყანას", — განაცხადა მან.

10 მაისს კობახიძემ განაცხადა, რომ როცა კონკრეტული შვეიცარიული ბანკი ერთი თვის განმავლობაში თანხის გადარიცხვას აფერხებს, ეს დამატებით კითხვებს აჩენს. მისივე თქმით, თუ ვინმეს ბიძინა ივანიშვილის პოლიტიკაში მობრუნება და ომში ჩართვა უნდა, მმართველი პარტიის დამფუძნებელს "კარად არ იცნობს".

ბიძინა ივანიშვილი Credit Suisse-ის მიერ დანიშნულ რწმუნებულს — Green Vals Trust-ს გერნსის სასამართლოში უჩივის. ამის შესახებ საქართველოს ყოფილი პრემიერმინისტრის მიერ დაქირავებული PR კომპანია, Cision-ი წერს.

Cision-ი შვეიცარიული ბანკის მიერ დანიშნულ რწმუნებულს — Green Vals Trust-ს ბენეფიციარების აქტივების მართვასთან დაკავშირებით ვალდებულებების სერიოზულ დარღვევასა და მისი კლიენტის კანონიერი ინტერესების უგულებელყოფაში ადანაშაულებს.

Cision-ის მიერ გავრცელებულ ინფორმაციაში წერია, რომ კომპანიის ბენეფიციარებმა Credit Suisse-ს რამდენჯერმე გაუგზავნეს წერილი, სადაც რწმუნებულის მხრიდან დარღვევებზე საუბრობდნენ.

როგორც ირკვევა, Credit suisse-ის მხრიდან დაზარალებულებმა თანხის გაცემა 2022 წლის 4 მარტს მოითხოვეს, რომელზეც თანხმობა რწმუნებულმა კომპანიამ მიმდინარე წლის 4 აპრილს გასცა. Cision-ის მტკიცებით, ამან მის კლიენტებს ფინანსური ზარალი მიაყენა.