ბრიტანეთის საგარეო საქმეთა სამინისტროს განცხადებით, უკრაინაში სამხედრო დანაშაულების გამოსაძიებლად ექსპერტთა ჯგუფს აგზავნიან, რათა უკრაინას მტკიცებულებების შეგროვებაში დაეხმარონ.

უკრაინის პროკურატურა დაახლოებით 7 600 პოტენციურ სამხედრო დანაშაულს იძიებს და სულ მცირე, 500 ეჭვმიტანილი ჰყავს.

"რუსეთმა უკრაინაში ბარბაროსობა და სისასტიკე ჩაიდინა, მათ შორის, ქალების მიმართ. ბრიტანული ექსპერტიზა უკრაინას სიმართლის გამოაშკარავებაში დაეხმარება, რათა პუტინის რეჟიმი საკუთარი ქმედებების გამო პასუხისგებაში მიეცეს", — განაცხადა დიდი ბრიტანეთის საგარეო საქმეთა მინისტრმა, ლიზ ტრასმა.

განცხადება მას შემდეგ გავრცელდა, რაც ცნობილი გახდა, რომ ტრასი ჰააგაში მიემგზავრება, რათა საერთაშორისო სისხლის სამართლის სასამართლოს მოსამართლეს შეხვდეს.

11 აპრილს უკრაინაში საფრანგეთის ელჩმა, ეტიენ დე პონსინმა განაცხადა, რომ საფრანგეთი უკრაინას რუსეთის მიერ ჩადენილი ომის დანაშაულების გამოძიებაში დაეხმარება. მისი თქმით, ლვოვში ტექნიკური და სამეცნიერო დანაყოფის ფრანგი ჟანდარმები ჩავიდნენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში