გერმანიის კანონმდებლებმა უკრაინისთვის მძიმე იარაღის მიწოდებას მხარი დაუჭირეს. ინფორმაციას DW ავრცელებს და აღნიშნავს, რომ მხარდაჭერილი წინადადების თანახმად, დახმარება უნდა გაგრძელდეს და რამდენადაც შესაძლებელია, დაჩქარდეს.

მედიის ცნობით, გერმანია, ასევე, განათავსებს მეტ ჯარისკაცს აღმოსავლეთ ევროპაში NATO-ს წარმომადგენლობის გასაძლიერებლად, ამასთან, მოუწოდებს რუს ჯარისკაცებს, დაყარონ იარაღი და ევროკავშირსა და გერმანიაში თავშესაფარი ეძიონ.

26 აპრილს აშშ-ის თავდაცვის მდივანმა, ლოიდ ოსტინმა გერმანიაში 40-ზე მეტი ქვეყნის თავდაცვის მინისტრთან მოლაპარაკებები გამართა და უკრაინის შეიარაღების საკითხი განიხილეს. აშშ-ს არმიის გენერალმა, მარკ მილიმ თქვა, რომ მოლაპარაკებების მთავარი მიზანი კიევისთვის უსაფრთხოების მზარდი დახმარების სინქრონიზაცია და კოორდინაციაა, რომელიც მოიცავს მძიმე იარაღის მიწოდებას. შეხვედრას ესწრებოდა უკრაინის თავდაცვის მინისტრი ალექსეი რეზნიკოვი.

უკრაინის საგარეო საქმეთა მინისტრმა, დმიტრო კულებამ განაცხადა, რომ უკრაინა შევიდა სრულიად ახალ ფაზაში, რომელსაც ჯერ კიდევ ორი თვის წინ ვერავინ წარმოიდგენდა. მისი თქმით, უკრაინის შეიარაღებული ძალები NATO-ს იარაღით მომარაგდება.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში