NDI-ს კვლევით, საქართველოს მოსახლეობისთვის ყველა რუსი ერთნაირი არ არის. ამასთანავე, კვლევაში აღნიშნულია, რომ საქართველოს მოსახლეობა რუს ხალხს უფრო მეტად აფასებს, ვიდრე რუსეთის მთავრობას.

ფოტო: NDI

ამასთანავე, კვლევაში აღნიშნულია, რომ გამოკითხულთა უმრავლესობა რუსეთთან სავიზო რეჟიმის დაწესებას უჭერს მხარს, კერძოდ, 66% ფიქრობს, რომ საქართველოს მთავრობამ რუსეთის მოქალაქეებისთვის სავიზო რეჟიმი უნდა შემოიღოს, 23%-ის აზრით, არ უნდა შემოიღოს, 11%-მა არ იცის, 1% კი უარს ამბობს პასუხზე.

კვლევიდან ვიგებთ, რომ სავიზო რეჟიმის შმოღებას ყველაზე მეტად ქართული ოცნების მხარდამჭერები, კაცები და უფროსი ასაკის მოქალაქეები არ უჭერენ მხარს.

NDI-ის კვლევა დიდი ბრიტანეთის მთავრობის UK aid ფინანსური ხელშეწყობით ხორციელდება. კვლევა ჩატარებულია CRRC საქართველოს მიერ.

ორგანიზაციის განცხადებით, ანგარიში რუსეთის მიერ უკრაინაში შეჭრამდე დაახლოებით ორი კვირით ადრე (3-15 თებერვალს) და ორი კვირის შემდეგ (9-20 მარტს) ჩატარდა და ქვეყნის წარმომადგენლობით (ოკუპირებილი ტერიტორიების გამოკლებით) ორი სატალეფონო გამოკითხვის შედეგებს ემყარება. რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით აარჩიეს. ინტერვიუები ჩატარდა: ქართულ, აზერბაიჯანულ, სომხურ და რუსულ ენებზე.

თებერვლის კვლევაში ჩატარდა 2 036 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი - +/- 1.8 პროცენტი. მარტის კვლევაში 2 204 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი +/- 1.6 პროცენტია. ცდომილების ზღვარი იცვლება სხვადასხვა კითხვის მიხედვით.