ქართული ოცნება პარტიის დაფუძნებიდან 10 წლის იუბილეს აღნიშნავს და ვრცელ განცხადებას აქვეყნებს, სადაც ისევ ბიძინა ივანიშვილს აქებს. მმართველი პარტია ამჯერადაც, ამტკიცებს, რომ რომ ხალხს "დემოკრატია და თავისუფლება" დაუბრუნეს.

"უმძიმეს და ურთულეს ვითარებაში შეძლო ქართულმა ოცნებამ ბიძინა ივანიშვილის ხელმძღვანელობით ქვეყნის განვითარებაში დემოკრატიული გარდატეხის შეტანა. ბიძინა ივანიშვილმა და ქართულმა ოცნებამ ხალხს დაუბრუნეს თავისუფლება და დემოკრატია, რაც ქვეყნის წინსვლისა და განვითარების აუცილებელი პირობაა", — ნათქვამია განცხადებაში.

მმართველი პარტია უკვე არაერთხელ ნახსენებ ფრაზას იმეორებს და თავს იქებს, რომ ერთადერთი ხელისუფლებაა, რომლის დროსაც ქვეყანაში ომი არ ყოფილა, ამას კი მათი "პრაგმატული საგარეო პოლიტიკით" ხსნიას.

"სერიოზული უსაფრთხოების გამოწვევების მიუხედავად, ქართულმა ოცნებამ განამტკიცა მშვიდობა და თვისებრივად აამაღლა ქვეყნის სტაბილურობისა და უსაფრთხოების ხარისხი. საქართველომ მიაღწია უპრეცედენტო წინსვლას დასავლურ სტრუქტურებში ინტეგრაციის გზაზე", — ამბობენ ისინი.

"ოცნება" ვრცლად საუბრობს საკუთარ "მიღწევებზე" და იმაზე, რა ვითარება იყო ქვეყანაში ხელისუფლებაში მათ მოსვლამდე. "ოცნებას" უყურადღებოდ არც ოპონენტები დაუტოვებია. ისინი წინა ხელისუფლებას კვლავ ავტორიტარულ რეჟიმად მოიხსენიებენ.

ქებისგან განსხვავებით, ძალიან მოკლედაა ნახსენები ის, რომ "შეცდომები და ხარვეზებიც" ჰქონდათ, თუმცა არაა დაკონკრეტებული, რას გულისხმობენ. აქვე აღნიშნავენ, რომ ამის მიუხედავად, უმთავრესი პრინციპებიდან არასდროს გადაუხვევიათ.

პრინციპებად კი თავისუფლებას, სოლიდარობას, პატრიოტიზმს, ეკლესიის პატივისცემას, სახელმწიფო სუვერენიტეტისა და ტერიტორიული მთლიანობის დაცვას ასახელებენ. ტრადიციულად, მადლობას უხდიან ბიძინა ივანიშვილს, რადგან პარტია სწორედ "ამ პრინციპებზე დააფუძნა".