ექსპრეზიდენტის, მიხეილ სააკაშვილის განცხადებით, საკვებს ვერ იღებს, რის გამოც, რამდენიმე დღის წინ ფეხებზე კონტროლი დაკარგა და ტკივილგამაყუჩებლის გამოყენება დასჭირდა.

"პრაქტიკულად, ვერ ვიღებ საკვებს. ალბათ, ამან გამოიწვია, თუ რამ გამოიწვია, ოთარ თოიძე არის აქ, ემპათიის წარმომადგენელი და მათ უკეთ იციან. კვირას დავკარგე მთლიანად ფეხების კონტროლი და ნუ, ეს იწვევს მცირე ტკივილებს, ხელებში და ფეხებში. რაც არის მერე ტკივილგამაყუჩებელი ნემსებით ხდება ამის მოხსნა", — თქვა მან პროცესზე.

ექსპრეზიდენტმა აღნიშნა, რომ სასამართლო პროცესზეც ამავე მიზეზით გახდა შეუძლოდ და ექიმის დახმარება დასჭირდა.

"მადლობელი ვარ, ექიმის რომელმაც ახლავე გამომიყვანა მდგომარებიდან. მომიხსნა, იმიტომ, რომ წეღან ხელახლა წამერთვა და ვერ შევძლებდი სხდომის გაგრძელებას თუ არა ძლიერი ტკივილგამაყუჩებელი, რომელიც ნემსით გამიკეთა ახლა", — დასძინა მან.

სააკაშვილი ამბობს იმასაც, რომ მუდმივი ზოგადი სისუსტე აღენიშნება, ასევე, პოსტრავმული სინდრომი, ძილის დარღვევა აქვს.

ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. მოგვიანებით სააკაშვილი პროცესზე ისევ შემოიყვანეს.