რუსეთში აპირებენ, რომ გეორგიევსკის ლენტი სამხედრო დიდების სიმბოლოებთან გააიგივონ. პარტია ერთიანი რუსეთის გენერალური საბჭოს მდივანმა, ანდრეი ტურჩაკმა კანონპროექტის სახელმწიფო სათათბიროში შეტანისას განაცხადა, რომ გეორგიევსკის ლენტის შეურაცხყოფის შემთხვევაში მოქალაქეს ადმინისტრაციული ან სისხლის სამართლის პასუხისმგებლობა დაეკისრება.

ტურჩაკის თქმით, გეორგიევსკის ლენტი, რუსი ხალხის "გმირობის, ვაჟკაცობისა და გამძლეობის სიმბოლოა", თუმცა პოსტსაბჭოთა ქვეყნები გეორგიევსკის ლენტს სულ უფრო მეტად ესხმიან თავს.

"გეორგიევსკის ლენტის სტატუსის კანონით გამტკიცება გაზრდის ჩვენი ომის დიდების სიმბოლოს სამართლებრივ დაცვას. ჩვენ მკაფიოდ აღვნიშნავთ, რომ ლენტის გამოყენება შესაძლებელია მხოლოდ ისტორიულ მეხსიერებასთან დაკავშირებულ საკითხებში. წინააღმდეგ შემთხვევაში, გამოყენებული იქნება ადმინისტრაციული ან სისხლის სამართლებრივი პასუხისმგებლობა", — ამბობს ის.

ლენტის სიმბოლურობაზე საუბრისას ტურჩაკი აცხადებს, რომ "რუსმა ჯარისკაცებმა 77 წლის წინ შეაჩერეს საბჭოთა ხალხის გენოციდი" და დღეს ისინი ოკუპირებული დონბასის მაცხოვრებლებსაც "იხსნიან გენოციდისგან".