დღეს, 31 მაისს, საქართველოს პრემიერმინისტრს, გიორგი კვირიკაშვილს საფრანგეთის პრეზიდენტი, ფრანსუა ოლანდი უმასპინძლებს. შეხვედრა ქალაქ ბორდოში, ღვინის ქალაქის ინაუგურაციაზე დაგეგმილი. საფრანგეთში ასევე იმყოფებიან სხვადასხვა ქვეყნის მაღალი თანამდებობის პირებიც.

ცნობილია, რომ მას შემდეგ, რაც ღვინის ქალაქი გაიხსნება, დამსწრე საზოგადოება ქართულ ღვინოსაც დააგემოვნებს. გარდა ამისა, დაგეგმილია საფრანგეთის პრეზიდენტის და საქართველო პრემიერმინისტრის პირისპირ შეხვედრაც, რომელიც 3 საათზე გაიმართება.

როგორც საქართველოს ელჩმა საფრანგეთში, ეკატერინე სირაძე-დელონემ განაცხადა, 2017 წლის ზაფხულში საქართველო, როგორც ღვინის ქვეყანა, ბორდოში პირველ ოფიციალურ სტუმრად არის მიწვეული:

"შესაბამისად ინაუგურაციის დროსაც საქართველოს განსაკუთრებული მნიშვნელობა მიენიჭა. ჩვენი პრემიერიც დაპატიჟებულია ამ ღონისძიებაზე".

პრემიერმინისტრთან ერთად საფრანგეთში სოფლის მეურნეობის მინისტრი, ოთარ დანელია და შინაგან საქმეთა მინისტრი, გიორგი მღებრიშვილიც არიან.