სამოქალაქო პლატფორმის "არა ფობიას" წევრი ორგანიზაციები ეხმაურებიან საქართველოს პარლამენტის წევრის, ზაქარია ქუცნაშვილის დისკრიმინაციულ განცხადებას, რომელიც მან 2017 წლის 26 აპრილს გააკეთა და რომელშიც დისკრიმინაციულად მოიხსენიებს ლგბტ ადამიანებს.

არასამთავრობოების შეფასებით, გარდა იმისა, რომ ქუცნაშვილის განცხადება შეიცავს სიძულვილის ენას, დეპუტატს შეცდომაში შეჰყავს საზოგადოება და მანიპულირებს ისეთი დელიკატური თემით, როგორიც საქართველოს ოკუპირებული ტერიტორიებია:

"როდესაც აცხადებს, თითქოს ქორწინების დეფინიციის კონსტიტუციაში ჩაწერით სახელმწიფო რაღაც საფრთხეს - "ცისფერების ქვეყანად" გადაქცევას - აიშორებს, ხოლო ლგბტ თემის დისკრიმინაციით შეიძლება აფხაზეთისა და ცხინვალის რეგიონის მოსახლეობის მეტი კეთილგანწყობა დავიმსახუროთ."

არასამთავრობო ორგანიზაციების შეფასებით, დეპუტატის მხარიდან ასეთი არაადეკვატური და სიძულვილით მოტივირებული განცხადებები განსაკუთრებული საფრთხის შემცველია, რადგან შესაძლოა, გააღვივოს ჰომოფობიური განწყობები.

პლატფორმა არა ფობიას! მოუწოდებს საჯარო პირებს თავი შეიკავონ დისკრიმინაციული და სიძულვილის ენის შემცველი განცხადებებისგან, რომლებმაც, შესაძლოა, შელახონ ადამიანის უფლებები და წაახალისონ სიძულვილით მოტივირებული დანაშაული.

არა ფობიას! წევრი ორგანიზაციები არიან:

  • საქართველოს დემოკრატიული ინიციატივა (GDI)
  • მედიის განვითარების ფონდი (MDF)
  • კონსტიტუციის 42-ე მუხლი
  • ბალტიისა და შავი ზღვის ალიანსი - საქართველო (BBSA-Georgia)
  • საქართველოს რეფორმების ასოციაცია (GRASS)
  • თანასწორობის მოძრაობა (Equality Movement)
  • საქართველოს ახალგაზრდა იურისტთა ასოციაცია (GYLA)
  • საერთაშორისო გამჭვირვალობა - საქართველო (TI)
  • იდენტობა
  • სამართლიანი არჩევნებისა და დემოკრატიის საერთაშორისო საზოგადოება (ISFED)
  • ტოლერანტობისა და მრავალფეროვნების ინსტიტუტი (TDI)

ზაქარია ქუცნაშვილმა 26 აპრილს ლგბტ ადამიანები დამამცირებელი ტერმინით მოიხსენია. მისი თქმით, ქორწინების კონსტიტუციური განსაზღვრებით საქართველო გზავნილებს აგზავნის ოკუპირებულ ტერიტორიებზე, რომ ევროპასთან ინტეგრაცია არ გულისხმობს "ცისფერების ქვეყანად" გადაქცევას.