ჯორჯიან ეარვეისი აცხადებს, რომ არაჯანსაღი კონკურენციის პირობებში იმყოფება რუსულ და თურქულ ავიაკომპანიებთან და აეროფლოტსა და თურქიშ ეარლაინსს დემპინგური ფასებით ოპერირებაში ადანაშაულებს. ამის შესახებ ქართულმა ავიაკომპანია ჯორჯიან ეარვეისმა განცხადება დღეს, 28 აპრილს გაავრცელა:

"როდესაც ქართულ ავიაბაზარზე მოღვაწეობენ ისეთი მონსტრი ავიაკომპანიები როგორებიცაა აეროფლოტი, თურქიშ ეარლაინსი და ა.შ. და ისინი სწორედ, მათი ქვეყნების მთავრობების პირდაპირი და არაპირდაპირი დაფინანსებით ახერხებენ დემპინგური ფასებით ოპერირებას, ჩვენ მუდმივად გვიხდება მუშაობა არაჯანსაღი კონკურენციის პირობებში. უფრo მეტიც, საქართველოს აეროპორტების გაერთიანება უცხოურ ავიაკომპანიებს, რომლებიც საკუთარ ქვეყნებში ისედაც სარგებლობენ შეღავათებით, საქართველოშიც მაქსიმალურ შეღავათებს უწესებს."

ჯორჯიან ეარვეისი სთხოვს ყველა კომპეტენტურ სტრუქტურას უზრუნველყოს სამართლიანი პირობები და "დაიცვას ეროვნული ავიაცია განადგურებისგან."

ჯორჯიან ეარვეისი ქართული ავიაკომპანიაა, რომელიც 1993 წლიდან ფუნქციონირებს. კომპანია ახორციელებს ფრენებს ვენის, ამსტერდამის, მოსკოვის, თელ-ავივის მიმართულებით და ამატებს ახალ მიმართულებებსაც ლონდონის, კიევის, პრაღის, პარიზის, ყაზანისა და სოჭის მიმართულებით.

ავიაკომპანია აცხადებს, რომ აკეთებს ყველაფერს ქართული ავიაციის შესანარჩუნებლად.