რუსეთში ირონიით პასუხობენ უკრაინის პრეზიდენტის განცხადებას, პრორუსი უკრაინელი დეპუტატისა და ოლიგარქის, ვიქტორ მედვედჩუკის გაცვლის შესაძლებლობაზე.

კრემლის პრესსპიკერი ამტკიცებს, თითქოს მედვედჩუკს არასდროს ჰქონია კულისებს მიღმა რუსეთთან ურთიერთობა. დმიტრი პესკოვის თქმით, ის არ არის რუსეთის მოქალაქე და კრემლში არ იციან, სურს თუ არა პრორუს პოლიტიკოსს მოსკოვის ჩართულობა მის საქმეში.

"რაც შეეხება გაცვლას, რომელზეც კიევში სხვადასხვა ფიგურა ასე აღტკინებით და ხალისით, საუბრობდა: მედვედჩუკი არ არის რუსეთის მოქალაქე, მას არანაირი კავშირი არ აქვს სპეციალურ სამხედრო ოპერაციასთან, ის არის საზღვარგარეთის პოლიტიკური ფიგურა", — ამბობს ის, თუმცა აღნშნავს, რომ მოსკოვი თვალს მიადევნებს მედვედჩუკის ბედს.

ამ საკითხს გამოეხმაურა ექსპრეზიდენტი და უშიშროების საბჭოს ხელმძღვანელის მოადგილე დმიტრი მედვედევიც და უკრაინის ხელისუფლებას დაემუქრა.

"ცალკეული ნაძირლები, რომლებიც საკუთარ თავს უკრაინის მთავრობას უწოდებენ, ამბობენ, რომ სურთ ვიქტორ მედვედჩუკისგან ჩვენების მოპოვება, მისი "სწრაფად და სამართლიანად" გასამართლება და შემდეგ ტყვეებში გაცვლა.

ამ მოღვაწეებს ურჩევნიათ გარშემო ყურადღებით იყურონ და ღამით კარი მყარად ჩაკეტონ, რომ გასაცვლელ პირებს შორის თავად არ აღმოჩნდნენ", — წერს მედვედევი.

უკრაინაში პრორუსი პოლიტიკოსი ვიქტორ მედვედჩუკი 12 აპრილს დააკავეს. როგორც უსაფრთხოების სამსახურში აცხადებენ, მედვედჩუკს უკრაინის შეიარაღებული ძალების ფორმა ეცვა, რათა შენიღბულიყო. პრეზიდენტმა, ვოლოდიმირ ზელენსკიმ დაკავებულის ფოტო სოციალურ ქსელში გამოაქვეყნა და ხალხს კოსმონავტიკის დღე მიულოცა.

მოგვიანებით მან რუსეთის ფედერაციას მედვედჩუკის უკრაინელ ტყვეებში გაცვლა შესთავაზა.

"თუ მედვედჩუკმა აირჩია საკუთარი თავისთვის სამხედრო ფორმა, ის ომის წესებს ექვემდებარება. მე რუსეთის ფედერაციას ვთავაზობ, რომ ეს თქვენი ბიჭი გაგვიცვალეთ ჩვენს ბიჭებსა და გოგოებში, რომლებიც ახლა რუსეთის ტყვეობაში არიან. მნიშვნელოვანია, რომ ჩვენმა სამართალდამცავებმა და სამხედროებმაც განიხილონ ეს შესაძლებლობა", — განაცხადა მან.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში