სისხლის სამართლის საერთაშორისო სასამართლოს მთავარი პროკურორი, კარიმ ხანი დღეს უკრაინის ქალაქ ბუჩას ეწვია და ჟურნალისტებს განუცხადა, რომ უკრაინა დანაშაულის ადგილია.

ICC იძიებს რუსეთის ძალების მიერ უკრაინაში მიმდინარე კონფლიქტის დროს ჩადენილ პოტენციურ სამხედრო დანაშაულებებს.

"ჭეშმარიტებამდე მისასვლელად ომის ნისლი უნდა გავარღვიოთ. ეს მოითხოვს დამოუკიდებელ, მიუკერძოებელ გამოძიებას", — თქვა ხანმა.

ICC-ის ცნობით, ხანი უკრაინის გენერალურ პროკურორს, ირინა ვენედიქტოვას კიევში შეხვდა. ისინი შეთანხმდნენ, რომ ჩართულობის გაღრმავება და პარტნიორობის შემდგომი გაძლიერება გადამწყვეტია უკრაინაში ჩადენილი შესაძლო საერთაშორისო დანაშაულების მონაწილეთა პასუხისგებისთვის.