სოციალურ ქსელში ქართულმა ჰაკერულმა დაჯგუფებამ გაავრცელა ინფორმაცია, რომ ერთ-ერთი ონლაინ ტოტალიზატორის ბაზა გატეხა. მათ მიერ გამოქვეყნებულ მონაცემთა ბაზაში იძებნება მომხმარებელთა მონაცემები, მათ შორის, ათასობით ფოტო პირადობის მოწმობით.

თავად ჰაკერული დაჯგუფება აცხადებს, რომ ბაზა კრისტალბეთს ეკუთვნის. დეტალების გასარკვევად On.ge-მ კომპანიაში დარეკა, სადაც გვითხრეს, რომ გადაამოწმებდნენ და დაგვიკავშირდებოდნენ.

ამასთან, იმის გასარკვევად, ფლობენ თუ არა ინფორმაციას საგამოძიებო ორგანოები, On.ge-მ შინაგან საქმეთა სამინისტროსა და სპეციალურ საგამოძიებო სამსახურს მიმართა. როგორც სპეციალურ საგამოძიებო სამსახურში გვითხრეს, კომპიუტერულ სისტემაში შეღწევა და კომპიუტერული მონაცემის ან კომპიუტერული სისტემის უკანონოდ გამოყენება მათ კომპეტენციას არ განეკუთვნება. რაც შეეხება შსს-ს, მათ პასუხს მიღებისთანავე შემოგთავაზებთ.