რუსთავი 2-ის მხარდასაჭერად სააპელაციო სასამართლოს ეზოში მისულმა ნინო გოგუაძემ ჟურნალისტებს გაუნცხადა, რომ რუსთავი 2-ის საქმე ხელისუფლების მიერ წარმართული პოლიტიკური პროცესია:

"ეს ნათლად გამოვლინდა პირველი ინსტანციის სასამართლოზე, მურუსიძეს იმიტომ ჩააბარეს სააპელაციო სასამართლო, რომ ყველა პოლიტიკური შეკვეთა შეასრულოს, ისე, როგორც ასრულებდა ნაციონალების დროს. თავისუფალმა დემოკრატებმა კარგად ვიცით, როგორ იქცევა ე.წ. დამოუკიდებელი სასამართლო, როცა შეკვეთა ზემოდან მოდის".

ნინო გოგუაძის თქმით, რუსთავი 2-ის საქმეზე ხელისუფლების გადაწყვეტილება საზოგადოების დაპირისპირებას გამოიწვევს:

"ეს არის ხელისუფლების უგუნური ნაბიჯი, რომელიც გამოიწვევს საზოგადოების დაპირისპირებას. ეს იქნება ევროინტეგრაციის საწინააღმდეგოად გადადგმული ნაბიჯი, რაც ძალიან კარგად იცის ხელისუფლებამ. ამის გამო არჩევნების ლეგიტიმაციის პროცესიც იქნება დაბალი, ხელისუფლება გამიზნულად მიდის ამ გზით.

ძალიან სამწუხაროა, რომ ხელისუფლებები მიდიან და მოდიან და ჭკუას ვერ სწავლობენ. ჩვენ დღეს ისევე ვიცავთ რუსთავი 2-ს, როგორც დამოუკიდებელი სიტყვის მთავარ ღირებულებას, როგორც თავის დროზე ვიცავდით ნაციონალური მოძრაობისგან იმედს, იბერიას თუ ბევრ სხვა ტელევიზიას".

თავისუფალი დემოკრატების ლიდერის თქმით, ბიძინა ივანიშვილმა ნაციონალების მმართველობის "მანკიერი პრაქტიკა" სრულად გადაიღო:

"ივანიშვილს ჰგონია, რომ ქვეყანაში რთული სიტუაცია კი არაა, ამას რუსთავი 2 აჩვენებს ხოლმე. ამიტომ უწოდა მას თავის წერილში სიცრუის ტირაჟირების მანქანა".

გოგუაძის თქმით, ივანიშვილს საკმაოდ ბევრი კონტროლირებული ტელევიზია ჰყავს და მას შეეძლო შეექმნა რუსთავი 2-ის საპირწონე ტელევიზია, რომელიც მისთვის სასურველ რეალობას გააშუქებდა.

თბილისის სააპელაციო სასამართლოში რუსთავი 2-ის საქმის განხილვის პარალელურად, სასამართლოს ეზოში შეკრებილნი არიან ტელეკომპანიის მხარდამჭერები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.