ოკუპირებული ცხინვალის დე ფაქტო პრეზიდენტი ანატოლი ბიბილოვი ოკუპირებულ დონეცკში ჩავიდა.

როგორც ე.წ. პრეზიდენტის პრესმდივანი, დინა გასიევა აცხადებს, ბიბილოვს ოკუპირებული დონეცკის ლიდერთან დენის პუშილინთან აქვს დაგეგმილი შეხვედრა. ის, ასევე, გეგმავს იმ მოხალისეებთან შეხვედრას, ვინც ომში იღებენ მონაწილეობას.

31 მარტს ცნობილი გახდა, რომ საოკუპაციო რეჟიმი აპირებს, ოკუპირებული ცხინვალის რეგიონში რუსეთთან შეერთებაზე რეფერენდუმი ჩაატაროს.

მას შემდეგ, რაც საქართველოს ოკუპირებული რეგიონის დე ფაქტო პრეზიდენტმა, ანატოლი ბიბილოვმა განაცხადა, რომ რუსეთთან შეერთებისთვის მალე ზომებს მიიღებდა, მათ ოფიციალურ გვერდზე პროპაგანდისტული შინაარსის სხვადასხვა განცხადება გავრცელდა, მათ შორის, იმაზე, რომ რუსეთთან გაერთიანებაზე რეფერენდუმი დაიგეგმება. ე.წ. რეფერენდუმი რუსეთისთვის ნაცადი ხერხია — იგივე მეთოდები გამოიყენეს უკრაინაში, როდესაც ანექსირებული ყირიმი რუსეთის ნაწილად გამოაცხადეს.

ე.წ. სახელმწიფო სააგენტო რესზე გამოქვეყნდა პარლამენტის სპიკერისა და ე.წ. პრეზიდენტის პრესსპიკერის განცხადებები. პარლამენტის სპიკერის თქმით, ე.წ. რეფერენდუმი უახლოეს მომავალში ჩატარდება და რუსეთთან შეერთებაზე ხალხი საკუთარ აზრს გამოთქვამს. მისივე განცხადებით, არანაირი სამართლებრივი წინააღმდეგობა არ არსებობს, რომ საქართველოს ოკუპირებული რეგიონი რუსეთს შეუერთდეს.

ამავე თემაზე: