80-წლიანი ლოდინის შემდეგ მერილ კუპერმა საშუალო სკოლის ატესტატი აიღო. კუპერი ახლა 101 წლისაა და ის 1934-38 წლებში ვირჯინიის ერთ-ერთ სკოლაში სწავლობდა. სკოლის დამთავრების ბოლო წელს კუპერი ოჯახთან ერთად ფინანსური მიზეზების გამო ფილადელფიაში გადავიდა საცხოვრებლად და ატესტატის აღება ვეღარ შეძლო.

სკოლა, რომლის ოფიციალურად დამთავრებაც კუპერმა ვერ შეძლო, 1865 წელს დაარსდა და სამოქალაქო ომის შემდეგ გათავისუფლებულ მონებს განათლების მიღებაში ეხმარებოდა. სკოლაში 1950-იანი წლების ბოლომდე ათასობით სტუდენტისთვის ცოდნის მიღების ადგილი იყო, თუმცა მოგვიანებით დაიხურა. კუპერი კი სკოლაში ლათინურს, ბიოლოგიას, ისტორიას, ინგლისურს და მათემატიკას სწავლობდა.

ფოტო: CNN

2018 წელს, როცა კუპერმა სატრანსპორტო ინდუსტრიაში მრავალწლიანი კარიერა დაასრულა, ის თავის სკოლას ეწვია. სკოლის შენობა ახლა ვირჯინიის ერთ-ერთი ეროვნული ისტორიული პარკის ნაწილია. კუპერმა სკოლის შენობაში ყოფნისას სინანული გამოთქვა იმის შესახებ, რომ ატესტატის აღება ვერ შეძლო.

კუპერის ოცნების ახდენის მიზნით მისი ოჯახი ეროვნული პარკის თანამშრომლებს დაუკავშირდა. ოჯახმა 101 წლის კუპერისთვის ცერემონიის გამართვა და დიპლომის გადაცემა ითხოვა, რაშიც ადგილობრივი მთავრობაც ჩაერთო. კუპერს ოჯახი და ეროვნული პარკის თანამშრომლები დაეხმარნენ, რათა ოცნება აესრულებინა და მას საშუალო სკოლის ატესტატი საზეიმოდ გადაეცა.

"ჩვენ მზად ვართ, რომ ნებისმიერ სტუდენტს, ახალგაზრდასა თუ მოხუცს დავეხმაროთ, რათა თავიანთი ოცნებების ახდენა შეძლონ. კუპერის შემთხვევაში ეს საშუალო სკოლის ატესტატის აღებას ნიშნავდა და ჩვენთვის დიდი პატივია, რომ ეს ოცნება რეალობად ვაქციეთ", — განაცხადა ადგილობრივი მთავრობის წარმომადგენელმა.