დილით ავტომობილის გახურებასთან დაკავშირებით ყველას თავისი მოსაზრება აქვს. ზოგი ფიქრობს, რომ ფრთხილად უნდა ვიყოთ ძრავასთან, განსაკუთრებით ცივ ამინდში დაქოქვისას და უნდა დაველოდოთ, სანამ წყლის მაჩვენებელზე არ აისახება ის ტემპერატურა, რომელიც აუცილებელია ძრავის გამართულად მუშაობისთვის. მეორე მხარე ამტკიცებს, რომ დაქოქვისთანავე შეგვიძლია, დაახლოებით ერთი წუთის შემდეგ დავიწყოთ გადაადგილება (ძრავის დატვირთვის გარეშე — მაქსიმალურად დაბალ ბრუნზე). ძრავა ასე ოპტიმალურ ტემპერატურასაც შედარებით მალე მიაღწევს და, შესაბამისად, ზეთიც უფრო სწრაფად გაცხელდება.

წარმოების მაღალი სტანდარტების გათვალისწინებით, ზოგიერთი ავტომწარმოებელი მიიჩნევს, რომ ახალი ავტომობილის შიდა წვის ძრავა აღარ საჭიროებს სამუშაო ტემპერატურამდე მიყვანას. ეს ძირითადად ახალგამოშვებულ მანქანებზე ვრცელდება. დღეს კი გაგაცნობთ იმ რამდენიმე მიზეზს, რატომაც არის აუცილებელი ძველი წლოვანების მანქანებისთვის ძრავის გახურება.

ძრავის ცივი ზეთი

დავიწყოთ ზეთით, რომელიც ძრავის გამართულად მუშაობისთვის აუცილებელია. უმნიშვნელოვანესია სწორი სიბლანტის ზეთის შერჩევა ჩვენი ავტომობილისათვის, რაც ამა თუ იმ მწარმოებლის რეკომენდაციით უნდა მოხდეს.

ცივი ზეთი გაცილებით სქელი და ბლანტია იმასთან შედარებით, რომელმაც უკვე მიაღწია სამუშაო ტემპერატურას. ამ ტემპერატურამდე მისვლის დროც სწორედ სიბლანტის მიხედვით განისაზღვრება. აქედან გამომდინარე, ძრავის ცვეთაც ინდივიდუალურია.

თუ თქვენ დაქოქვისთანავე მკვეთრად დაადგამთ გაზს ფეხს, მაშინ ძალიან გარისკავთ, რადგან შესაძლებელია, ძრავის მნიშვნელოვანი კომპონენტები დააზიანოთ. ცივი ზეთი ვერ უზრუნველყოფს ყველა დეტალის შეზეთვას, რის შედეგადაც ცვეთა და ძრავის დაზიანების რისკიც გაიზრდება.

მოკლედ, ზეთი ერთ-ერთი მიზეზია იმისა, რის გამოც აუცილებელია ზამთარ-ზაფხულ ავტომობილის გახურება, ზამთარში — მით უმეტეს.

დატვირთვა

თუ არ გსურთ, რომ ძრავას ბევრი პრობლემა შეექმნას, მაშინ ის ყოველთვის ფრთხილად გაათბეთ. თქვენი ძრავა საკუთარ თავს შეადარეთ — წარმოიდგინეთ, რამდენად რთულია, როდესაც დილით ადგომისთანავე რაიმე საქმის შესრულებას იწყებთ. ამ მომენტში თქვენი ორგანიზმი ჯერ კიდევ არ არის გამოფხიზლებული. ასეა ძრავაც, რომელსაც დაქოქვისთანავე დატვირთვით ვამუშავებთ, ამიტომ სანამ ის სამუშაო ტემპერატურამდე არ გაცხელდება, მისი ბრუნის სიხშირე ბრუნის დიაპაზონის ქვედა მესამედში უნდა დარჩეს. მოკლედ რომ ვთქვათ, ის უნდა ვამუშაოთ მდორედ, ყოველგვარი დატვირთვისა და წვალების გარეშე, რადგან დიდი შანსია, ამით არა მხოლოდ ძრავის დეტალები, არამედ ავტომობილის სხვა მნიშვნელოვანი არეალიც დავაზიანოთ.

როგორც ზემოთ აღვნიშნე, ძრავის გახურების დრო ძირითადად ზეთის სიბლანტეზეა დამოკიდებული. თუ თქვენი ავტომობილის ზეთის სიბლანტე არ განგისაზღვრავთ, ამაში "თეგეტა მოტორსის" სერვისცენტრებში დაგეხმარებიან და პროფესიონალი მექანიკოსები ძრავის მოვლის რჩევებსაც გაგიზიარებენ.