სიყვარულის გამო ბევრ სისულელეს აკეთებენო, გსმენიათ ალბათ ან თვითონაც გაგიკეთებიათ. არის ხოლმე შემთხვევები, როცა სიყვარულისგან თავის ასარიდებლადაც აკეთებენ რაღაც სისულელეებს, ხოლო ინტროვერტების შემთხვევაში სახლიდან გასვლისა და ხალხში გარევის პრევენციისთვის შეიძლება სასწაული რაღაც დაგეგმო.

ინდოელი კაცი, რომელმაც ტერორისტული აქტი შეთხზა, ინტროვერტი არ ყოფილა და, პრინციპში, არც შეყვარებული ყოფილა, უფრო მატრაკვეცა ადამიანი იყო, რომელსაც ცოლი და შვილიც ჰყავს და გასართობად ცოლს ვირტუალურად ღალატობდა. მან გაცნობის ერთ-ერთ საიტზე გაიცნო გოგო, რომელიც სხვა ქალაქში ცხოვრობდა და დიდი ხნის განმავლობაში ეფლირტავებოდა და სიყვარულს ეფიცებოდა.

ერთ დღესაც, გოგომ მოგზაურობა შესთავაზა. მას მუმბაისა და გოაში უნდოდა წასვლა და თავისი ვირტუალური ბოიფრენდის გაცნობა. 32 წლის კრიშნამ თავის ონლაინ გელფრენდს უარი ვერ უთხრა, მაგრამ მოგზაურობაც არ გამოდიოდა, რადგან ჯერ ერთი ცოლ-შვილიანი იყო და მეორეც ამ მოგზაურობისთვის ფული არ ჰქონდა. ამიტომ მის თავში გენიალური იდეა დაიბადა.

კრიშნამ ანონიმური მეილი შექმნა და პოლიციას უცნობი ქალის სახელით მისწერა, რომ შემთხვევით თვითმფრინავის გატაცების გეგმას მოკრა ყური, რის შედეგადაც ინდოეთის აეროპორტებში უსაფრთხოების დონე დროებით ასწიეს.

ცხადია, ანონიმური წერილზე გამოძიება დაიწყო. შედეგად მიაკვლიეს ინტერნეტ კაფეს საიდანაც კრიშნამ წერილი გააგზავნა, ხოლო შემდეგ თავად კრიშნასაც დაადგნენ და დააპატიმრეს.

"თვითმფრინავის ბილეთის ფული არ ჰქონდა და იფიქრა, რომ თუ ფრენები გაუქმდებოდა წასვლაზე უარის თქმის ლეგიტიმური მიზეზი ექნებოდა და ამიტომ მოიგონა ტერორისტული აქტი", ნათქვამია ჰიდერაბადის პოლიციის განცხადებაში.