აშშ-ის შტატ მერილენდის წარმომადგენელთა პალატამ მხარი დაუჭირა კანონპროექტის მიღებას, რომელიც კრძალავს კატებისთვის ბრჭყალების დაძრობას — ქირურგიულ პროცედურას, რომელიც შინაური ცხოველების ნაკაწრების თავიდან ასაცილებლად გამოიყენება.

პრაქტიკოსები, რომლებიც დაარღვევენ კანონს, დაჯარიმდებიან 1000 დოლარით. გამონაკლისი შემთხვევები შეეხება ისეთ ქმედებებს, რომლებიც განხორციელებული იქნება აუცილებელი თერაპიული პროცედურის ჩასატარებლად, თუმცა კანონპროექტში ჯერ არ არის დაზუსტებული, თუ კონკრეტულად რა იგულისხმება ამ პროცედურებში.

ფოტო: Marc-Antoine Fardin

ცხოველთა დაცვის ორგანიზაცია, სახელად ჰუმანური საზოგადოება, კატებისთვის ბრჭყალების დაძრობის პროცედურას ამპუტაციას ადარებს: კატისთვის ბრჭყალის დაძრობა იგივე ტკივილს იწვევს, რაც შეიძლება მაშინ ვიგრძნოთ, როცა ფეხის თითს მოგვაჭრიან. კონკრეტულმა ქმედებამ შეიძლება სიარულის პრობლემებიც შეუქმნას კატებს და სხვა ისეთი ქცევითი პრობლემები გამოიწვიოს, როგორიცაა კბენა.

2019 წელს აშშ-ის შტატ ნიუ-იორკში ეს პროცედურა კანონით აიკრძალა. "ამ არქაული პრაქტიკის აკრძალვით ჩვენ უზრუნველვყოფთ, რომ ცხოველები აღარ დაექვემდებარონ არაადამიანურ და არასაჭირო პროცედურებს", — განაცხადა მაშინდელმა მთავრობამ.

თუ მერილენდშიც საბოლოოდ მიიღებენ აღნიშნულ კანონს, მაშინ ის ამერიკის რიგით მეორე შტატი გახდება, სადაც კატებისთვის ბრჭყალების დაძრობა აიკრძალება.

ამერიკის ვეტერინარული სამედიცინო ასოციაცია არაკომერციული ორგანიზაციაა, რომელიც 97 000-ზე მეტ ვეტერინარს აერთიანებს აშშ-ში. ამ დიდი და მნიშვნელოვანი ორგანიზაციის ვებსაიტზე ვკითხულობთ, რომ "კრძალავს კატებისთვის ბრჭყალების დაძრობას, როგორც არჩევით პროცედურას და მხარს უჭერს სხვა, არაქირურგიულ ალტერნატივებს". გამონაკლისია ისეთი შემთხვევები, როგორიცაა მაგალითად, ევთანაზია.

კატებისთვის ბრჭყალების დაძრობა კანონითაა აკრძალული ისეთ ქვეყნებში, როგორებიცაა დიდი ბრიტანეთი, ისრაელი და შვეიცარია.