ოკუპანტების ტყვეობიდან გათავისუფლებული მელიტოპოლის მერი, ივან ფედოროვი ვიდეომიმართვას ავრცელებს და ამბობს, რომ დარწმუნებულია უახლოეს მომავალში გუნდთან ერთად მელიტოპოლის ცენტრალურ მოედანზე უკრაინის დროშას აწევს. ფედოროვმა მადლობა გადაუხადა ყველა მელიტოპოლელს, ვისაც არ ეშინოდა დაკავების, რეპრესიების, დაკითხვის და იცავდა თავის პოზიციას მიტინგებზე გამოსვლით.

"ჩვენთან ასეა მიღებული, დავიცვათ ჩვენი ინტერესები ხმამაღლა. მინდა მადლობა გადაგიხადოთ მხარდაჭერისთვის. ყოველდღე, როცა საინფორმაციო ვაკუუმსა და იზოლაციაში ვიყავი, ვგრძნობდი, რომ ჩემთვის იბრძოდით. მინდა მადლობა გადავუხადო მელიტოპოლის ყველა მეგობარს, რომლებიც იცავდნენ ჩემსა და მოქალაქეების ინტერესებს საერთაშორისო და სრულიად უკრაინის პლატფორმაზე და გააკეთეს ყველაფერი შესაძლებელი და შეუძლებელიც კი, რომ მე სწრაფად გავეთავისუფლებინე.

მინდა მადლობა გადავუხადო უკრაინის პრეზიდენტს, ვლადიმერ ზელენსკის დახმარებისთვის, მხარდაჭერისთვის, იმისთვის, რომ ჩემი გათავისუფლება ასე სწრაფად მოხდა. ცოტა მოგვიანებით ყველაფერს ვიტყვი დეტალურად და ვისაუბრებთ გეგმებზე. აბსოლუტურად დარწმუნებული ვარ იმაში, რომ გუნდთან ერთად უახლოეს მომავალში ავწევთ ჩვენს უკრაინულ დროშას მელიტოპოლის ცენტრალურ მოედანზე. ხოლო, ვინც ეს დროშა ჩამოხსნა აწი ჩვენს მშვენიერ ქალაქში ნამდვილად აღარ იცხოვრებს. დიდება უკრაინას", — აცხადებს ის.

მელიტოპოლის მერი ტყვეობიდან გუშინ გაათავისუფლეს. 11 მარტს ანტონ გერაშენკომ თქვა, რომ ოკუპანტებმა მელიტოპოლის მერს, ივან ფედოროვს თავზე ტომარა ჩამოაცვეს და გაიტაცეს. მისივე ინფორმაციით, მერმა ოკუპანტებთან თანამშრომლობაზე უარი თქვა. მოქმედი მერის გატაცების შემდეგ, რუსებმა მელიტოპოლში ახალი "მერი" დანიშნეს. ზაპოროჟიეს რეგიონალურ სამხედრო ადმინისტრაციაში 15 მარტს განაცხადეს, რომ გატაცებული მერი ივან ფედოროვი ოკუპირებულ ლუგანსკის ტერიტორიაზე იყო, სადაც მას ბრალს "ტერორიზმის" მუხლით სდებდნენ.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში