უკრაინულმა მედიამ რამზან კადიროვი ტყუილში გამოიჭირა. როგორც ადგილობრივი გამოცემა, უკრაინსკაია პრავდა წერს, ონლაინ რესურსებისა და უსაფრთხოების სამსახურში წყაროს დახმარებით, დაადგინეს, რომ ჩეჩნეთის ლიდერი, ბოლო ერთი კვირის განმავლობაში უკრაინაში არ ყოფილა.

უსაფრთხოების სამსახურიდან წყაროს მოწოდებულ ინფორმაციაზე დაყრდნობით, გამოცემა ამბობს, რომ კადიროვი ტელეფონის 2 ნომერს იყენებს. უკრაინის მობილური ოპერატორების მონაცემების მიხედვით, ბოლო 7 დღის განმავლობაში კადიროვის ეს ნომრები როუმინგში ჩართული არ იყო და არც უკრაინული კავშირის ანძებთან იყო დაკავშირებული.

საჯარო ონლაინ სერვისის დახმარებით, გამოცემამ სცადა დაედგინა მისამართი, ქალაქი და ქვეყანა, სადაც ახლა კადიროვის ტელეფონის ნომერია. მათი განმარტებით, ეს სერვისი ლინკის გენერირებას ახდენს, რომელიც მომხმარებლის ლინკზე გადასვლისთანავე ნომრის ადგილსამყოფელის გაგების საშუალებას იძლევა. ამის ფონზე, თავად მომხარებელი ვერაფერს იგებს, რადგან გადადის ჩვეულებრივ ვებ-გვერდზე, რომელიც ბმულზეა მითითებული.

გამოცემა აცახდებს, რომ კადიროვს ტელეგრამში შეტყობინება მისწერეს და პროპაგანდისტული მედიის, RIA-ს ჟურნალისტებად გაეცნენ. მათ სტატიის ლინკი, ზუსტად იმ დღეს გაუგზავნეს ჩეჩნეთის ლიდერს, როდესაც კადიროვი ამტკიცებდა, რომ უკრაინაშია.

ფოტო: უკრაინსკაია პრავდა

მათი თქმით, აღნიშნულმა ონლაინ სერვისმა ნომრის გეოლოკაცია დაადგინა — რუსეთის ფედერაცია, ქალაქი გროზნო. გამოცემის თანახმად, ტელეფონის მონაცემების მიხედვით, მტკიცდება, რომ ჩეჩნეთის ლიდერმა მოიტყუა, თითქოს 13 მარტს კიევის მიმდებარედ იმყოფებოდა.

14 მარტს კადიროვი ამტკიცებდა, რომ უკრაინაში გაემგზავრა და მალე კიევში იქნება. კადიროვი ტელეგრამ არხიდან უკრაინის ლიდერებს ემუქრება და ამბობს, რომ მალე ჩეჩნები იპოვიან მათ. კადიროვის მტკიცებით, თავად კიევში ერთი მხრიდან შედის, ხოლო მეორე მხრიდან "ძველი გამოცდილი მებრძოლები".

ეს ვიდეო უკრაინულ მედიაშიც გავრცელდა, უკრაინის შინაგან საქმეთა მინისტრის მრჩეველი, ანტონ გერაშენკო ამბობდა, რომ ჩეჩნეთის ლიდერი რამზან კადიროვი უკრაინაში იმყოფებოდა და მიმართავდა და მოუწოდებდა, სარდაფებში არ დამალულიყო.

კადიროვი ტელეგრამ არხზე ამ ვიდეოსაც გამოეხმაურა და თქვა, რომ ის გოსტომელშია გადაღებული და კიევიდან დაახლოებით 20 კმ-ითაა დაშორებული.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში