ბოლო მონაცემებით, საფრანგეთში, 23 აპრილის საპრეზიდენტო არჩევნების პირველი ტურის ხმების 97 პროცენტი დათვლილია, ყველასთვის მოულოდნელად კი პირველ ადგილზე გავიდა ცენტრისტი ემანუელ მაკრონი, მან ხმების 23,9 პროცენტი მიიღო, რაც შეეხება მეორე ადგილზე გასულს კანდიდატს, 21,4 პროცენტი აიღო ულტრა-ნაციონალისტმა მარინ ლე პენმა. შესაბამისად, სწორედ ეს ორი კანდიდატი დაუპირისპირდება ერთმანეთს 7 მაისს, საპრეზიდენტო არჩევნების მეორე ტურში.

ცენტრისტი ემანუელ მაკრონი, რომელსაც ამ დრომდე არჩევნებში მონაწილეობა არასდროს მიუღია, თავიდანვე აუტსაიდერად მიიჩნეოდა, თუმცა, ყველასთვის მოულოდნელად, ხმების რაოდენობით პირველ ადგილზე, სწორედ ის გავიდა. ლე პენისგან განსხვავებით, მაკრონი ემხრობა ევროკავშირის გაძლიერებას და მასში საფრანგეთის აქტიურ ჩართულობას. მაკრონი მოქმედი პრეზიდენტის, ფრანსუა ოლანდის მთავრობის ეკონომიკის მინისტრი იყო, თუმცა, საპრეზიდენტო კამპანიაში ჩართვის გამო, 2016 წლის აგვისტოში გადადგა.

ემანუელ მაკრონი ბიზნესის კუთხით ლიბერალური რეფორმების გატარების მომხრეა, ხოლო სოციალურ საკითხებზე ის მემარცხენე პოლიტიკას იზიარებს.

რაც შეეხება ლე პენს, ის გამოირჩევა ქსენოფობიური, ძირითადად, ისლამოფობიური რიტორიკით, სურს ევროკავშირიდან გასვლა და მიიჩნევს, რომ საფრანგეთმა უნდა შეწყვიტოს მიგრანტთა მიღება, რადგან მათ ევროპის მთავარ საფრთხედ მიიჩნევს.