ულტრანაციონალისტური გაერთიანება ქართული ძალის წარმომადგენელი ნიკოლოზ ბურნაძე On.ge-სთან საუბარში უარყოფს, რომ მათი რომელიმე წევრი 29 მაისის, საღამოს, თბილისში, ვეგანურ კაფეში შეიჭრა. მისი თქმით, მათ არანაირი კავშირი არ აქვთ ამ კაფესთან და არც არანაირი იდეოლოგიური პროტესტი გააჩნიათ ვეგანების მიმართ:

"ხორცს რატომ არ ჭამ - ეს არის მარაზმი და ამასთან კავშირი არ გვაქვს. ალბათ კაფეს უკეთებენ პიარს, ან სურთ რომ ჩვენ გაგვიკეთონ ამით ანტიპიარი. არანაირი იდეოლოგიური პროტესტი არ გვაქვს ვეგანებთან ან რატომ უნდა გვქონდეს, არ ვიცი".

კაფე კივის ერთ-ერთი თანამშრომელი ჩვენთან საუბარში იხსენებს, რომ არაერთხელ ჰქონიათ ნაციონალისტური დაჯგუფების წევრებთან კონფლიქტი. მისივე განცხადებით, გუშინ, 29 მაისს, ქართული ძალის ერთ-ერთი წევრი გიორგი ბაქრაძე ამოიცნეს მათ შორის, ვინ კაფეში შეიჭრა. კაფეს წარმომადგენელი, რომელსაც ვინაობის საჯაროდ დასახელება არ სურს, ამბობს, რომ კაფეში რამდენიმე პირი შევიდა პროვოკაციის მოსაწყობად, სოსისები მიიტანეს და იქ მყოფ ხალხს სიტყვიერი შეურაცხყოფა მიაყენეს, ამას მოჰყვა ხმაური და მოგვიანებით ფიზიკური დაპირისპირება ადგილობრივ მცხოვრებლებთან, ფიზიკური დაპირისპირება არ მომხდარა ვეგანურ კაფეში ხორცით შევარდნილ მამაკაცებთან:

"ისინი პროვოკაციისთვის მოვიდნენ და მოაწყვეს პროვოკაცია, ძალიან მომზადებულები იყვნენ, არაფერი გაუკეთებიათ ისეთი, რაც კანონს გადააბიჯებდა, არ გვაძლევდნენ ფილმის ჩვენების საშუალებას, ხორცი ეჭირათ, რაც კანონით არ არის აკრძალული. ამის შემდეგ ხმაური ატყდა, მეზობელი გამოვარდა დანით, კონფლიქტი მოგვივიდა უბნელებთან, მათ დიდი ხანია არ მოვწონვართ, რადგან არასტანდარტული ხალხი დადის ჩვენთან. ამ დროს ქართული ძალის წევრები წავიდნენ, მერე უკვე მეზობლებმა ჩვენ დაგვიწყეს ჩხუბი, რატომ ხმაურობთო და ერთ-ერთი ჩვენი ჯგუფის წევრი გოგო თმებით ათრიეს".

როგორც კაფეს ჯგუფის წევრი ამბობს, ნაციონალისტების შეჭრა ვეგანობასთან კავშირში არ იყო, არამედ იმასთან, რომ აღნიშნულ ადგილს ხშირად სტუმრობს "არასტანდარტულის სტილის" ხალხი:

"რაც მოხდა პირველ რიგში ვეგანობასთან არ იყო დაკავშირებული, არამედ იმასთან, რომ ჩვენს კაფეში ძალიან ხშირად დადიან ლგბტ პირები, ფერადთმიანი, პირსინგიანი ხალხი. ნაციონალისტები არაერთხელ მოსულან. დაახლოებით ერთი თვის წინ იყვნენ მოსულები და მკითხეს, აქ როგორი ხალხი დადისო? გუშინწინ ღამითაც იყვნენ აქ, ჩვენი ორი წევრი დახვდათ, შეაფურთხეს და მიაძახეს, კიდევ შევხვდებითო. ბევრს ვცნობ უკვე სახეზე მათი მოძრაობიდან".

შინაგან საქმეთა სამინისტროში On.ge-ს განუცხადეს, რომ 29 მაისს, კაფე Kiwi-ში მომხდარ ფაქტზე უკვე დაიწყო გამოძიება სისხლის სამართლის კოდექსის 125-ე მუხლით, რაც ცემას გულისხმობს.

ქართული ძალა არის ულტრანაციონალისტური დაჯგუფება, რომელმაც 2016 წლის 26 მაისს თბილისში, რუსთაველის გამზირზე მოაწყო მსვლელობა რასისტული ლოზუნგებით.