აზერბაიჯანულენოვანი ტელეარხის, Meydan Tv-ის ჟურნალისტი, ჯამალ ალი, მიმდინარე წლის 19 აპრილს საქართველოში არ შემოუშვეს. ის ბერლინიდან თბილისში ჩამოფრინდა.

On.ge შეეცადა გაერკვია, რა იყო ჯამალ ალის ქვეყანაში არ შემოშვების მიზეზი. ჟურნალისტი საქართველოში რამდენიმე თვის წინაც იმყოფებოდა და მოამზადა კრიტიკული რეპორტაჟი აზერბაიჯანული სახელმწიფო ნავთობკომპანია SOCAR-ის შესახებ, რომელიც საქართველოში ეკლესიებს გაზით უფასოდ ამარაგებს.

საგარეო საქმეთა სამინისტროში და სახელმწიფო უსაფრთხოების სამსახურში გვითხრეს, რომ ამ საკითხზე კომენტარის გაკეთება აღნიშნულ უწყებებს არ შეეძლოთ, რადგან საზღვარზე უცხო ქვეყნის მოქალაქის არ შემოშვება სასაზღვრო პოლიციის პრეროგატივაა.

შინაგან საქმეთა სამინისტროს პრესსამსახურში კი გვითხრეს, რომ კონკრეტული პირის საზღვარზე შემოშვება ან არ შემოშვება კონფიდენციალური ინფორმაციაა, რომელსაც არ გაასაჯაროებენ.

როგორც ჯამალ ალი ამბობს, მესაზღვრეებმა მიზეზებიც არ აუხსნეს, გარკვეული პერიოდით დააკავეს და შემდეგ უახლოესი რეისით ისევ უკან, ბერლინში დააბრუნეს.

Meydan Tv აზერბაიჯანულენოვანი მედიასაშუალებაა, რომელიც გერმანიაში დაფუძნდა. ის ალიევის ხელისუფლების მიმართ კრიტიკულადაა განწყობილი და აქტიურად აშუქებს აზერბაიჯანში სახელისუფლებო კორუფციის საკითხებს. აღნიშნული მედიასაშუალების ჟურნალისტები აზერბაიჯანში არაერთხელ გამხდარან დევნის ობიექტები.

როგორც ჟურნალისტი ჯამალ ალი აზერბაიჯანულ საინფორმაციო სააგენტო Turan-თან ამბობს, მისი საქართველოში არშეშვება პროფესიულ საქმიანობას უკავშირდება.