კაცი, რომელმაც პროპუტინისტურ, პრორუსულ და ჰომოფობიურ პარტიას, ალტ-ინფოს ხულოში ოფისის მიქირავებაზე უარი უთხრა, ხალხის შეგროვებული თანხის ნაწილს უკრაინას ურიცხავს. როგორც დათო სოლომნიშვილი ფეისბუქგვერდზე წერს, ერთ დღეში 3 430 ლარი შეუგროვეს და მადლობას უხდის ყველას, ვინც მის ანგარიშზე თუნდაც ერთი ლარი ჩარიცხა.

"გუშინ ჩემს ანგარიშზე მესიჯები არ წყდებოდა. ერთ დღეში დამერიცხა 3 430 ლარი, რაც ძალიან მეუხერხულება, მაგრამ ახლა მხოლოდ მადლობის გადახდა დამრჩენია. კიდევ ერთხელ დავრწმუნდი, რომ ერთმანეთის მხარდაჭერა არის ყველაზე ძლიერი იარაღი მტერთან საბრძოლველად. მივიღე გადაწყვეტილება, შემოსული თანხიდან 1000 ლარი გადავრიცხო უკრაინელების დახმარების ფონდში", — წერს ის.

სოლომნიშვილი ოფისის პარტიისთვის ფართის მიქირავებაზე უარის თქმის მიზეზს განმარტავს და ამბობს, რომ არ სურს მის მუნიციპალიტეტში "ვინმემ ვინმეზე იძალადოს".

"როდესაც მე მივიღე გადაწყვეტილება, რომ ჩემი ფართიდან გამეშვა ის ხალხი, ეს გავაკეთე იმიტომ, რომ არ მინდა ჩემს მუნიციპალიტეტში ვინმემ ვინმეზე იძალადოს და დააპირისპიროს ადამიანები ერთმანეთს. ჩემთვის ფული არ ღირს იმად, რომ ხვალ ვინმემ მოღალატე მიწოდოს", — აღნიშნა მან.

მას შემდეგ რაც გავრცელდა ინფორმაცია, რომ ხულოს მცხოვრებმა ძალადობრივ პარტიას ოფისი დაატოვებინა, ერთ-ერთმა ფეისბუქმომხმარებელმა მისთვის ფართის ერთი თვის ღირებულების, 1 500 ლარის შეგროვების ინიციატივა გამოთქვა. მისი თქმით, ეს სამოქალაქო თვითშეგნების მაგალითია და საზოგადოებამ ამის საპასუხო სოლიდარობა უნდა გამოხატოს. როგორც აღმოჩნდა, ინიციატივას ბევრი თანამოაზრე გამოუჩნდა და წინასწარდათქმულ თანხაზე მეტი შეგროვდა.