შუახევში ძალადობრივ, პრორუსულ ალტ-ინფოს პარტიას ოფისი გახსნამდე დაახურინეს. როგორც ფართის მეპატრონემ დავით დავითაძემ On.ge-ს უთხრა ოფისზე ბანერები გუშინ გააკრეს და ჯერ გახსნილიც არ იყო, დღეს კი უკვე ჩამოხსნეს.

მეპატრონის განცხადებით, მას არ ჰქონდა ინფორმაცია ძალადობრივი ჯგუფის პარტიაზე, კონსერვატიულ მოძრაობაზე, სულ სხვა პარტია ეგონა, თუმცა როდესაც გაიგო, ვინ იყვნენ, ამბობს, რომ მაშინვე უარი უთხრა ფართის მიქირავებაზე.

შენობიდან ბანერების ჩამოხსნის კადრები სოციალურ ქსელში სოსო ზოიძემ გაავრცელა.

ალტ-ინფოს ოფისი აქამდე ხულოში დაახურინეს. ბოლო დროს ვრცელდება ინფორმაცია, რომ ძალადობრივი მოძრაობა სხვადასხვა რეგიონში ხსნის ოფისებს, რასაც საზოგადოევის ნაწილი აპროტესტებს, მაგალითად გორში მათ ოფისს წითელი საღებავი შეასხეს, ახალციხეში კი ბანერზე წარწერები გააკეთეს.

20 ნოემბერს ძალადობრივმა, ჰომოფობიურმა და პრორუსულმა ალტ-ინფომ პარტია დააფუძნა, რომელსაც კონსერვატიული მოძრაობა უწოდეს. პარტიის თავმჯდომარედ 5 ივლისის ძალადობის ერთ-ერთი ორგანიზატორი ზურაბ მახარაძე აირჩიეს.

5-6 ივლისს ჯამში 50-ზე მეტ ჟურნალისტს, სამოქალაქო მოძრაობების ოფისებსა და მშვიდობიან მოქალაქეებს დაესხნენ თავს. ამ მოვლენების გამო სამოქალაქო საზოგადოებისა და ოპოზიციის ნაწილი შინაგან საქმეთა მინისტრის პასუხისმგებლობის საკითხის დაყენებას მოითხოვს, რადგან მიაჩნიათ, რომ მან მშვიდობიანი მოქალაქეების და ჟურნალისტების უსაფრთხოების დაცვა ვერ უზრუნველყო.