საერთაშორისო გამჭირვალობა საქართველოს განცხადებით, ხელისუფლებამ შერჩევითად, არაპროპორციულად და დაუსაბუთებლად დაკავების პრაქტიკა განაგრძო. ასე ორგანიზაცია 7 მარტს კანცელარიასთან უკრაინის სოლიდარობის აქციაზე რამდენიმე პირის დაკავებას ეხმაურება.

"უკრაინის მიმართ სოლიდარობის დემონსტრაციების ფონზე, ბოლო დღეებში, ხელისუფლებამ სამოქალაქო აქტივისტების დაკავებები დაიწყო და მათ მიმართ ადმინისტრაციული დაკავების შერჩევითად, არაპროპორციულად და დაუსაბუთებლად გამოყენების პრაქტიკა განაგრძო. აღნიშნული მიუთითებს ხელისუფლების სურვილზე, რომ უსაფუძვლო დაკავებებით საზოგადოებამ თავი შეიკავოს პროტესტის თუ სოლიდარობის გამოხატვისა და შეკრებისა და მანიფესტაციის უფლებით სარგებლობისგან", — ნათქვამია განცხადებაში.

TI-ის შეფასებით, დაკავებების დროს სამართალდამცავები და სასამართლო აქტივისტების უფლებებს პერმანენტულად არღვევდნენ. ორგანიზაციაში ამბობენ, რომ ადგილი ჰქონდა კანონმდებლობის შერჩევითად გამოყენებასა და აქტივისტთა უსაფუძვლო დაკავებას. ორგანიზაციაში აღნიშნავენ, რომ ქვეყანაში გამოხატვისა და შეკრების თავისუფლების კუთხით მდგომარეობა უარესდება.

"აღსანიშნავია ისიც, რომ ადმინისტრაციულ სამართალდარღვევათა კოდექსში 2021 წელს განხორციელებული ცვლილებებით, აქტივისტების წინააღმდეგ ხშირად გამოყენებად მუხლებზე გაიზარდა ჯარიმის ოდენობა და ადმინისტრაციული პატიმრობის მინიმალური ვადა, რასაც დამატებითი მსუსხავი ეფექტი აქვს", — ამბობენ ისინი.

საერთაშორისო გამჭირვალობა საქართველო დაკავების შემდეგ გამოვლენილ დარღვევებს შორის შემდეგს გამოყოფს:

• დაკავებულებს უფლებებს არ განუმარტავენ;
• ადვოკატებს არ ეძლევათ საქმეში დროულად ჩართვისა და დაკავებულებთან შეხვედრის შესაძლებლობა;
• დაკავების ოქმები შაბლონური და არაინფორმატიულია;
• პოლიცია დაუსაბუთებლად იყენებს დაკავების მაქსიმალურ ვადას.

რაც შეეხება სასამართლო პროცესში გამოვლენილ დარღვევებს, ორგანიზაცია ხაზს უსვამს შემდეგს:

• სასამართლოს მიერ გამოყენებული ადმინისტრაციული სამართალდარღვევის კოდექსი ხარვეზიანია;
• სასამართლო არ აფასებს დაკავების კანონიერებას;
• სასამართლოში გამოკვლეული მტკიცებულებები არასაკმარისია დაკავებულისათვის ადმინისტრაციული სახდელის შესაფარდებლად;
• სასამართლო გადაწყვეტილება უმეტესად დაუსაბუთებელი და შაბლონურია.

ისინი ხელისუფლებას მოუწოდებენ, არ გასცდნენ კონსტიტუციურ ჩარჩოებს და შეწყვიტონ სამოქალაქო აქტივისტების გამოხატვის თავისუფლების შეზღუდვა. ამასთან, მისცენ მათ კანონმდებლობით გარანტირებული უფლებებითა და თავისუფლებებით სრულყოფილად სარგებლობის შესაძლებლობა.

7 მარტს კანცელარიასთან აქციაზე რამდენიმე პირი ტუალეტის ქაღალდის სროლისა და ფქვილის შეყრის გამო დააკავეს. 8 მარტს დააკავეს მოძრაობა სირცხვილიას წევრი, შოთა დიღმელაშვილი, რომელმაც მთავრობის ადმინისტრაციას კვერცხები ესროლა. აქტივისტმა დაკავებამდე სამართალდამცველს განუმარტა, რომ პროტესტს ასე წინა დღის აქციის სხვა მონაწილეების დაკავების გამო გამოხატავს.