შანაე ბრუკის მკვლელობაში ბრალდებულს, რაფაელ მურსაკულოვს 20 წლით თავისუფლების აღკვეთა მიუსაჯეს. გადაწყვეტილება საქალაქო სასამართლომ მიიღო.

რაფაელ მურსაკულოვს ბრალდება საქართველოს სისხლის სამართლის კოდექსის 179-ე მუხლის პირველი ნაწილით და 109-ე მუხლის პირველი ნაწილის გ და მესამე ნაწილის გ ქვეპუნქტებით ჰქონდა წარდგენილი.

მურსაკულოვი 2021 წლის 8 სექტემბერს დააკავეს. გარდაცვლილის ოჯახი დამნაშავისთვის სამუდამო პატიმრობას ითხოვდა.

გასული წლის 31 ივლისს გავრცელდა ინფორმაცია, რომ მეგობრები თბილისში ავტრალიის მოქალაქეს, შანაე ბრუკს ეძებდნენ. ისინი Facebook-ზე წერდნენ, რომ ქალი 30 ივლისს, დღის მეორე ნახევრიდან, მთაწმინდის რაიონში სეირნობის შემდეგ დაიკარგა. ბრუკის ერთ-ერთი მეგობრის თქმით, შანაე ბოლოს ტელეფონზე მეგობარს ელაპარაკებოდა, როდესაც მას მოულოდნელად თავს დაესხნენ, ის კი დახმარებას ითხოვდა. დღის ბოლოს გავრცელდა ინფორმაცია, რომ თბილისში შანაე ბრუკი მთაწმინდის ფერდობზე გარდაცვლილი იპოვეს.