საქართველოს ოფიციალური ვიზიტით უნგრეთის პრემიერმინისტრი ვიქტორ ორბანი ეწვია.

საგარეო საქმეთა სამინისტროს პრესსამსახურის ცნობით, ორბანს აეროპორტში ვიცე-პრემიერი, ალექსანდრე ჯეჯელავა, საგარეო საქმეთა მინისტრი მიხეილ ჯანელიძე და უნგრეთში საქართველოს ელჩი ზაზა კანდელაკი დახვდნენ.

ვიზიტის ფარგლებში დაგეგმილია შეხვედრები საქართველოს საკანონმდებლო და აღმასრულებელი ხელისუფლების წარმომადგენლებთან. იგეგმება ხელმოწერა ოფიციალურ დოკუმენტებზე და უნგრულ-ქართულ ბიზნეს ფორუმში მონაწილეობა.

პრემიერ-მინისტრი ვიქტორ ორბანთან ერთად საქართველოში უნგრეთის საგარეო საქმეთა და ვაჭრობის მინისტრი პიტერ სიიარტო, ეროვნული ეკონომიკის მინისტრი მიჰაი ვარგა, ადამიანური რესურსების მინისტრი ზოლტან ბალოგი, სოფლის მეურნეობის მინისტრი შანდორ ფაზეკაში, ეროვნული განვითარების სამინისტროს ენერგეტიკის საქმეთა სახელმწიფო მინისტრი ანდრაშ არადსკი და პრემიერ-მინისტრის კაბინეტის უფროსი იანოშ ნაგი ჩამოვიდნენ.

მოძრაობა აუდიტორია 115-ის წევრები და CEU-ს ქართველი კურსდამთავრებულები 21 აპრილს, 12 საათზე, სასტუმრო ქორთიარდ მერიოტის მიმდებარე ტერიტორიაზე მშვიდობიანი საპროტესტო აქციით დახვდებიან უნგრეთის პრემიერმინისტრს. დემონსტრანტები ცენტრალური ევროპის უნივერსიტეტის წინააღმდეგ მიღებულ კანონს გააპროტესტებენ.