რუსეთის უკრაინაში შეჭრისა და სრულმასშტაბიანი ომის დაწყების საპასუხოდ, მსოფლიოს ერთ-ერთმა უდიდესმა ციფრულმა სტრიმინგ სერვისმა, ნეტფლიქსმა, რუსეთში მაუწყებლობა შეწყვიტა.

ნეტფლიქსმა ჯერ კიდევ რამდენიმე დღის წინ განაცხადა, რომ არაერთი სხვა კომპანიის კვალდაკვალ რუსეთში დაგეგმილ ყველა სამომავლო პროექტს აჩერებდა. მათ შორის იყო ოთხი რუსული წარმოების პროექტი, რომელთაგან ერთ-ერთის გადაღებებიც კი მიმდინარეობდა უკვე. ნეტფლიქსმა ასევე უარი თქვა, საკუთარ პლატფორმაზე რუსული პროპაგანდისტული არხები დაეშვა, მიუხედავად იმისა, რომ რუსეთის კანონმდებლობა ამას ავალდებულებდა.

ამჯერად კი, კომპანიამ გადაწყვიტა, ქვეყანაში საკუთარი მომსახურების მიწოდება სრულად შეეწყვიტა.

"შექმნილი გარემოებების გათვალისწინებით, გადავწყვიტეთ, ჩვენი სერვისი რუსეთში შევაჩეროთ", — განაცხადა ნეტფლიქსის წარმომადგენელმა.

ნეტფლიქსმა ასევე განაცხადა, რომ 2015 წელს გამოსული დოკუმენტური ფილმი — ცეცხლოვანი ზამთარი: უკრაინის ბრძოლა თავისუფლებისთვის — პლატფორმაზე უფასოდ ხელმისაწვდომი გახდება. ფილმში უკრაინაში ევრომაიდნის პროტესტი და მას შემდეგ განვითარებული მოვლენებია აღწერილი, მათ შორის, ყირიმის ოკუპაცია.

რუსეთისთვის დაწესებული ეკონომიკური სანქციების გარდა, ქვეყანას ბოიკოტი არაერთმა გლობალურმა ბრენდმა გამოუცხადა. რუსეთში გაყიდვები შეაჩერეს ისეთმა ტექგიგანტებმა, როგორებიც Microsoft, Apple და Dell არიან. ქვეყანაში ყველა მაღაზია დახურა ასევე Ikea-მ.

ამ ყველაფერთან ერთად, თითქმის ყველა ცნობილმა კინოკომპანიამ რუსეთში პრემიერები გააუქმა. ქვეყანაში დაგეგმილი კონცერტები გააუქმეს ნიკ ქეივმა, Green Day-მ და Placebo-მაც.

ამასთან, რუსეთი მოიხსნა ევროვიზიის სიმღერის კონკურსიდან — სავარაუდოდ, არა მხოლოდ წელს, რადგან ფესტივალის ორგანიზატორმა ევროპის მაუწყებელთა კავშირმა რუსული ტელეკომპანიები გააძევა. ქვეყნის ოფიციალური დელეგაცია არ დაიშვება არც კანის კინოფესტივალზე. ამ ყველაფერთან ერთად, აღსანიშნავია, რომ რუსულ სახელმწიფო ინსტიტუტებთან თანამშრომლობა ფრანკფურტის წიგნის ბაზრობამაც შეწყვიტა. პუტინის პოლიტიკის აქტიური და პასიური მხარდამჭერი ხელოვანები, მათ შორის სოპრანო ანა ნეტრებკო და დირიჟორი ვალერი გერგიევი ასევე დაითხოვეს წამყვანი მუსიკალური დაწესებულებებიდან.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

ასევე იხილეთ: