ვითიბი ბანკსა და საქართველოში იტალიის საელჩოს შორის შეთანხმება შედგა — საელჩოს მიერ 2022 წელს საქართველოში ორგანიზებულ კულტურულ ღონისძიებებს ვითიბი ფინანსურ მხარდაჭერას გაუწევს.

ეს ღონისძიებები საქართველოს მოსახლეობისთვის იტალიური კულტურის გაცნობასა და მის კიდევ უფრო პოპულარიზაციას ისახავს მიზნად.

ვითიბი ბანკი იტალიის საელჩოს მხარდამჭერი 2011 წლიდან არის. ამ თანამშრომლობის შედეგად არაერთი მნიშვნელოვანი და საინტერესო ღონისძიება ჩატარდა, მათ შორის, გამოფენები: მიქელანჯელო და სიქსტეს კაპელა, ტიციანი, ფერთა ოსტატი. მადონა ყრმით, რენესანსის დიდოსტატები. გრაფიკული ნამუშევრები, Evidence. A New State of Art, ექსპოზიცია მარადიული რომი. ასევე, იტალიური მოდის 60 წლის იუბილესადმი მიძღვნილი გამოფენა, თანამედროვე ბალეტის მსოფლიო პრემიერა, ბიატრიჩე და სხვა.

ვითიბი ბანკის მარკეტინგისა და საზოგადოებასთან ურთიერთობის დეპარტამენტის ხელმძღვანელმა, შოთა მაჭავარიანმა იმედი გამოთქვა, რომ ქართველ მაყურებელს არაერთხელ მიეცემა შესაძლებლობა, იტალიური ხელოვნების უნიკალურ მრავალფეროვნებას გაეცნოს.