თბილისის მერი, კახა კალაძე აცხადებს, რომ ყველა უკანონო მშენებლობის დემონტაჟი განხორციელდება, ხოლო მაცხოვრებლებს მიმართავს, რომ "თავი უხერხულ მდგომარეობაში არ ჩაიგდონ" და სახლები თავად დაშალონ.

"ახლა ჩამოვედი მე აქ თბილისში და თაღლითურად მიწა მივიტაცე, მერე რა რომ 2 ბინა მაქვს, 3 მიწის ნაკვეთი რეგიონში, არ ვარგა, ეს მიდგომა კატეგორიულად მიუღებელია და არ დავუშვებთ. ასე რომ, მეგობრებო, არავინ შეგიყვანოთ შეცდომაში, ტყუილად არ დაგახარჯინონ თანხები იმისთვის, რომ იქ რაღაც მშენებლობები განახორციელონ. მოხდება ყველას დემონტაჟი, გაფრთხილებთ კიდევ ერთხელ, თავი არ ჩაიგდოთ უხერხულ მდგომარეობაში, თავი არ ჩაიგდოთ მძიმე მდგომარეობაში. ვისაც გაქვთ ეს უკანონო მშენებლობები შეგიძლიათ, მოგცემთ მაგის საშუალებას, თქვენთვითონ განახორციელოთ დემონტაჟი და შემდეგ შეგიძლიათ მასალა გამოიყენოთ და არ გაგიფუჭდეთ", — განაცხადა მან.

კალაძის თქმით, მიუხედავად არაერთი პროვოკაციის, ქართული ოცნების ხელისუფლება "ბავშვების ინტერესებს" გვერდით არასდროს დებს. კალაძემ პირობა დადო, რომ არცერთი ოჯახი, რომელსაც ბავშვი ჰყავს და "მართლა უსახლკაროა" უყურადღებოდ არ დარჩება.

"მე მინდა განსაკუთრებით მივმართო ბავშვიან ოჯახებს — არცერთ თქვენგანს, ვინც დღეს უკანონოდ მიტაცებულ და შემდეგ უკანონოდ აშენებულ შენობებში იმყოფებით და გეშინიათ, რომ ქუჩაში დარჩებით, პირობას გაძლევთ, ძალიან ბევრჯერ მისაუბრია ამაზე, და აი, როგორც ადამიანი ადამიანს, ადამიანურად გეუბნებით, რომ არ დარჩებით არცერთი უყურადღებოდ, ყველა იქნებით უზრუნველყოფილი", — ამბობს ის.

მისივე მტკიცებით, კონკრეტული ტელევიზიები უკანონობას ახალისებენ. კალაძე მათ "დაფიქრებისკენ" მოუწოდებს.

"უკანონოდ სახელმწიფო მიწების მიტაცება და შემდეგ კონკრეტული ტელევიზიებით ამის წახალისება კატეგორიულად მიუღებელია. მინდა მივმართო, ასევე, ამ ტელევიზიებს, დაფიქრდით, რას აკეთებთ, თქვენ ახალისებთ პირდაპირ უკანონობას და ხვალ-ზეგ თქვენთან მოვლენ და თქვენ შეგექმნებათ იგივე პრობლემები და სახელმწიფომ და კანონმა უნდა დაგიცვათ", — თქვა მან.

14 თებერვალს აფრიკის მცხოვრებლები მშენებლობების დაკანონების მოთხოვნით, სამგორის გამგეობაში შევიდნენ. მათ განაცხადეს, რომ არცერთი ადამიანი, მითუმეტეს, სოციალურად დაუცველი, უსახლკაროდ არ უნდა დარჩეს და თუ მოთხოვნები არ დაკმაყოფილდება შენობის პიკეტირებას მოახდენენ.

11 თებერვალს თბილისის მერიამ განაცხადა, რომ მუნიციპალურმა ინსპექციამ ე.წ აფრიკის დასახლებაში სახელმწიფო მიწაზე უკანონო მშენებლობების რამდენიმე ფაქტი გამოავლინა. მათი თქმით, მშენებლობის მწარმოებლებს გააფრთხილეს, რომ ნაგებობები დაანგრიონ, წინააღმდეგ შემთხვევაში, დემონტაჟს თავად განახორციელებენ.

28 იანვარს მერიამ ორხევის დასახლებაში საცხოვრებელი სახლები დაანგრია. ამაზე, თბილისის მერმა, კახა კალაძემ განაცხადა, რომ დასახლებაში მერიის მიერ დანგრეული სახლების მფლობელებს თბილისში ბინები, ხოლო რეგიონებში მიწის ნაკვეთები აქვთ. მისი თქმით, სახელმწიფო ტერიტორიების უკანონო მშენებლობებზე ყოველთვის ექნება რეაგირება.

აფრიკის დასახლების მცხოვრებლებს სახლები 2020 წლის 15 დეკემბერს დაუნგრიეს. რასაც მოსახლეობის პროტესტი და წინააღმდეგობა მოჰყვა. ადგილზე რამდენიმე ადამიანიც დააკავეს.

დასახლებაში განვითარებულ პროცესებზე საუბრისას, კალაძე აცხადებდა, რომ ქონების უკანონოდ მიტაცება და მასზე შენობა-ნაგებობების განთავსება მიუღებელია. ასევე, ამბობდა, რომ მოსახლეობას სახლები და მიწები აქვთ და ისინი მიწების მიტაცებას მიზანმიმართულად ცდილობენ. პასუხად ადგილობრივებმა თქვეს, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.