უკრაინის პრეზიდენტმა, ვოლოდიმირ ზელენსკიმ მოსახლეობისთვის სპეციალური ვიდეომიმართვა გაავრცელა, რომელშიც მოსალოდნელ ომზე ისაუბრა. მისი განცხადებით, ეუბნებიან, რომ 16 თებერვალს დაიწყება სამხედრო ინტერვენცია, რასაც ისინი ერთობით უპასუხებენ. კერძოდ, ზელენსკიმ განაცხადა, რომ ამ დღეს უკრაინის დროშების და ცისფერ-ყვითელი ლენტების გამოფენით შეხვდებიან და მსოფლიოს მათ ერთიანობას აჩვენებენ.

"გვეუბნებიან, რომ 16 თებერვალს იქნება თავდასხმის დღე, ჩვენ ვაქცევთ გაერთიანების დღედ. შესაბამის განკარგულებაზე ხელი მოწერილია. ამ დღეს ჩვენ ჩამოვკიდებთ ეროვნულ დროშებს, გავიკეთებთ ლურჯ და ყვითელ ლენტებს და მსოფლიოს ჩვენს ერთობას ვაჩვენებთ. ჩვენ გვაშინებენ დიდი ომით და ისევ ნიშნავენ სამხედრო ინტერვენციის თარიღს. ეს უკვე პირველი შემთხვევა არ არის. ჩვენი სახელმწიფო ისეთი ძლიერია, როგორიც არასდროს", — ამბობს ზელენსკი.

მისი თმით, უკრაინა იბრძვის მშვიდობისკენ და სურთ, ყველა საკითხი გადაწყდეს მხოლოდ მოლაპარაკებების გზით. ზელენსკი აღნიშნავს, რომ სხვისას არ ითხოვს, მაგრამ საკუთარ არავის არ მისცემს.

"ჩვენ ერთი ევროპული სწრაფვა გვაქვს. ჩვენ გვინდა თავისუფლება და ვიბრძოლებთ მისთვის. ზეციდან გვიყურებს გარდაცვლილი 14 ათასი სამშობლოს მცველი და მშვიდობიანი მოქალაქე, რომელიც ამ ომმა შეიწირა. ჩვენ მათ ხსოვნას არ ვუღალატებთ.

ჩვენ ყველას გვინდა ცხოვრება ბედნიერად, ბედნიერებას კი უყვარს ძლიერნი. ჩვენ არასდროს შეგვეძლო დანებება და არ ვაპირებთ, რომ ეს ვისწავლოთ.

გიყვარდეთ უკრაინა! ჩვენ მშვიდად ვართ! ჩვენ ძლიერები ვართ! ჩვენ ერთად ვართ!", — თქვა მან.

11 თებერვალს ამერიკის შეერთებული შტატების სახელმწიფო მდივანმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას. მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა. ამერიკის მსგავსად სხვა ქვეყნებიც მოუწოდებენ საკუთარ მოქალაქეებს დატოვონ უკრაინა.