ნაციონალურმა მოძრაობამ შუალედურ არჩევნებზე კანდიდატად ნუგზარ ფუტკარაძის შვილი, მათე ფუტკარაძე წარადგინა.

"მე მინდა ახლა ქართულ საზოგადოებას წარვუდგინო ნუგზარ ფუტკარაძის ვაჟი, მათე ფუტკარაძე. ადამიანი, რომელიც შედის ბრძოლაში იქ, სადაც მამამ გაიმარჯვა, ის, სადაც მამამ თვეების განმავლობაში კარდაკარ იარა და პირველ ტურშივე მოიპოვა დამაჯერებელი გამარჯვება და ჩვენ ყველანი, ნუგზარ ფუტკარაძის მეგობრები, მივყვებით ამ ბრძოლაში მათე ფუტკარაძეს.

ამით გვინდა დავამტკიცოთ და აუცილებლად დავამტკიცებთ, რომ ვერც შანტაჟი და ვერც მოსყიდვა, ვერც ძალადობა, ვერც სიკვდილიც კი ვერ გაიმარჯვებს სამართლიანობაზე. როგორც არასდროს, ვარ დარწმუნებული, რომ 2 აპრილს ღირსება გაიმარჯვებს", — განაცხადა ენმ-ის თავმჯდომარემ, ნიკა მელიამ წარდგენაზე.

2 აპრილს საქართველოს პარლამენტისა და მუნიციპალიტეტის საკრებულოს შუალედური არჩევნები გაიმართება. ამომრჩევლები რუსთავში საქართველოს პარლამენტის, ხოლო ბათუმში საკრებულოს მაჟორიტარს აირჩევენ.

ნუგზარ ფუტკარაძე ბათუმის საკრებულოში ნაციონალური მოძრაობის მაჟორიტარი იყო. ის 18 ნოემბერს გარდაიცვალა. 24 ნოემბერს პარტიამ სპეციალური ბრიფინგი გამართა და მის გარდაცვალებაში ქართული ოცნება დაადანაშაულა. კერძოდ, ენმ-ში აცხადებენ, რომ ფუტკარაძეზე აჭარის მთავრობის თავმჯდომარის, თორნიკე რიჟვაძის მამა, ძალოვანი უწყების მოქმედი მაღალჩინოსანი, დავით რიჟვაძე ზეწოლას ახდენდა. აღსანიშნავია, რომ ენმ დავით რიჟვაძეს ოპოზიციონერი წევრების მუქარაში იქამდეც ადანაშაულებდა.

დღეს, 3 დეკემბერს მეშვიდე მოწვევის საკრებულოების პირველი სხდომა იმართება, სადაც თავმჯდომარეებს, მათ მოადგილეებსა და კომისიის წევრებს აირჩევენ.