თბილისის მერის, კახა კალაძის განცხადებით, საზოგადოებრივ ტრანსპორტში გადახდილი მთლიანი საფასურის და მგზავრობის რაოდენობის შეფარდებით, ერთი მგზავრობის ღირებულება 32 თეთრია.

"რაც შეეხება ტარიფს, საზოგადოებრივ ტრანსპორტში გადახდილი მთლიანი საფასურის და მგზავრობის რაოდენობის შეფარდებით, ერთი მგზავრობის ღირებულება, დღეის მდგომარეობით, 32 თეთრი გამოდის. ჩვენ ვისმენთ ოპონენტების მხრიდან ძალიან ბევრ არასწორ განცხადებას ამასთან დაკავშირებით. მაქსიმალურად ცდილობენ, რომ საზოგადოება შეცდომაში შეიყვანონ. საჭიროებიდან გამომდინარე, შეგიძლიათ შეიძინოთ სხვადასხვა ტიპის პაკეტები", — განაცხადა კალაძემ.

თბილისის მერის თქმით, დღეისთვის გაყიდულია 40 000 აბონემენტი და უმრავლესობა ერთთვიანი და ერთწლიანია.

პირველი თებერვლიდან თბილისის საზოგადოებრივ ტრანსპორტში ულიმიტო მგზავრობის სისტემა და შესაბამისი ტიპის ბარათები ამოქმედდა. კახა კალაძემ გადახდის ახალი სისტემის წარდგენისას ფასები ისე ჩამოთვალა, თითქოს მთავარი სიახლე აბონემენტები იყო და არა მგზავრობის საფასურის ზრდა. კერძოდ, ყველა ტიპის საზოგადოებრივ ტრანსპორტში, იქნება ეს მეტრო, ავტობუსი თუ მიკროავტობუსი, ერთჯერადად მგზავრობის ღირებულება 1 ლარი იქნება.

გაიგე მეტი: