ინფორმაციის თავისუფლების განვითარების ინსტიტუტის (IDFI) ინფორმაციით, პოლონელმა სპეციალისტებმა აჭარაში სრულად გახსნეს მასობრივი ტერორის მსხვერპლთა მე-6 სამარხი, სადაც 29 ადამიანის ნეშტი იპოვეს.

IDFI-ის მიერ შესწავლილი შსს არქივში დაცული დოკუმენტების მიხედვით, ეს ადამიანები საბჭოთა პერიოდში, 1938 წლის 15 მარტს, ღამის 4 საათზე დახვრიტეს. თუმცა ამის თქმა დაზუსტებით მხოლოდ დამატებითი კვლევების შემდეგ იქნება შესაძლებელი. მათივე ცნობით, აღმოჩენილ ნეშტებს ხელები უკან აქვთ შეკრული, ხოლო თავის ქალაზე აღენიშნებათ ცეცხლსასროლი იარაღით მიყენებული შემავალი ჭრილობა.

"დოკუმენტის თანახმად, საქართველოს შინაგან საქმეთა სახალხო კომისრის, გოგლიძის 1938 წლის 11 მარტის მიმართვისა და აჭარის ავტონომიური რესპუბლიკის შინაგან საქმეთა სახალხო კომისრის, ზაქარაიას ბრძანებით, 1938 წლის 15 მარტს, ღამის 4 საათზე დახვრიტეს 29 ადამიანი.

აღმოჩენილ ნეშტებს ხელები უკან აქვთ შეკრული, ხოლო თავის ქალაზე აღენიშნებათ ცეცხლსასროლი იარაღით მიყენებული შემავალი ჭრილობა — ზუსტად ისეთი ნახვრეტი, როგორიც აღენიშნებათ სხვა ქვეყნებში მსგავს ადგილებში აღმოჩენილ, საბჭოთა დიდი ტერორის დროს დახვრეტილი ადამიანების თავის ქალებს. გარდა ამისა, სამარხები, რომელიც წარმოადგენს წინასწარ გათხრილ დიდ ორმოებში ერთად მოთავსებული ათეულობით ადამიანის ნეშტს (რომელსაც შემდეგ სავარაუდოდ მიწის ერთიანი მასა გადააყარეს), სხვა ქვეყნებში აღმოჩენილი ანალოგიური ადგილების იდენტურია", — ამბობს ორგანიზაცია.

IDFI-ის ცნობით, სამარხებში ასევე აღმოჩენილია 1930 წლიდან 1936 წლის ჩათვლით მოჭრილი საბჭოური მონეტები (კაპიკები), ღილები, სავარცხელი, ბოთლის ნამსხვრევები, ფეხსაცმლისა და ტანსაცმლის ნარჩენები.

ორგანიზაციის მიერ არქივებში ჩატარებული კვლევით, 1937-1938 წლებში სხვადასხვა სადამსჯელო ოპერაციის შედეგად, აჭარაში სულ 1050 ადამიანი დახვრიტეს, მათგან 11 ქალია.

"IDFI თვლის, რომ აუცილებელია წარიმართოს ცნობიერების ამაღლების კამპანია მოსახლეობაში, განსაკუთრებით სკოლის მოსწავლეებსა და სტუდენტებს შორის, რაშიც უნდა ჩაერთოს მთავრობა, სასულიერო პირები, სპეციალისტები და საკითხზე მომუშავე ორგანიზაციები, რათა აქტიურად გავრცელდეს ინფორმაცია 1937-38 წლებში მიმდინარე რეპრესიების მსხვერპლთა შესახებ", — აღნიშნავენ ორგანიზაციაში.

აჭარაში ნეშტების ამოსვენებისა და შესწავლის სამუშაოებს ბათუმისა და ლაზეთის ეპარქიისა და IDFI-ის მოწვევით 2022 წლის 24 იანვრიდან პოლონეთის ეროვნული მეხსიერების ინსტიტუტის (IPN) დელეგაცია ატარებს.