2 თებერვლის ვაჭრობის შედეგად, ლარი დოლართან მიმართებით კვლავ გამყარდა. დღეს დადგენილი კურსის მიხედვით, ერთი დოლარის ღირებულება 3,0286 ლარი გახდა, რაც აქამდე მოქმედ კურსთან შედარებით 1,65 თეთრით გამყარებას ნიშნავს. აღსანიშნავია, რომ ეროვნული ვალუტა დოლართან მიმართებით ბოლო 20 თვის მაქსიმალურ ნიშნულამდეა გამყარებული.

რაც შეეხება ევროს, ამ ვალუტასთან მიმართებით ლარი 0,32 თეთრით გამყარდა და ერთი ევრო 3,425 ლარს გაუტოლდა.

ეკონომისტები ეროვნული ვალუტის დოლართან მიმართ გამყარების ერთ-ერთ ფაქტორად ფულადი გზავნილების გაზრდილ მოცულობას ასახელებენ — როგორც ცნობილია, 2021 წელს საქართველოში $2,35 მილიარდის ფულადი გზავნილი გადმოირიცხა, რაც გასულ წლებთან შედარებით რეკორდულად მაღალი მაჩვენებელია.

გარდა ამისა, გამკაცრებულია მონეტარული პოლიტიკაც, რაც ლარის გაცვლითი კურსის დასტაბილურებისთვის ხელისშემწყობი ფაქტორია. დღეს, 2 თებერვალს ეროვნული ბანკის მონეტარული პოლიტიკის კომიტეტმა რეფინანსირების განაკვეთი უცვლელად, 10,5%-ზე დატოვა.

სებ-ის მიერ დღეს დადგენილი გაცვლითი კურსი ხვალ, 3 თებერვალს შევა ძალაში.