დარიალი ჰესი საქართველოს ტურისტული მიმართულებების სიაში შევა. ინიციატივა საქართველოს პრემიერ-მინისტრს, გიორგი კვირიკაშვილს ეკუთვნის. მან ამ ინიციატივით განათლებისა და ეკონომიკის სამინისტროებს მთავრობის დღევანდელ სხდომაზე მიმართა.

კვირიკაშვილს მიაჩნია, რომ დარიალი ჰესი უნიკალური და საინტერესო მიწისქვეშა ნაგებობაა და ბევრმა ადამიანმა უნდა ნახოს.

„ბევრ ქვეყანაში არის ასეთი პრაქტიკა, რომ მსგავს მაღალტექნოლოგიური საინჟინრო ნაგებობებს აჩვენებენ როგორც ტურისტებს, ასევე ახალგაზრდებს, მოსწავლეებს და მინდა, ყველამ ნახოს, რამდენად რთული სამუშაო შესრულდა დღეს, ჩვენს თანამედროვე საქართველოში, ჩვენი კომპანიების მონაწილეობით. ეს არის ნამდვილად საამაყო საქმე", - აღნიშნა პრემიერ-მინისტრმა.

გიორგი კვირიკაშვილის თქმით, დარიალი ჰესმა, თავისი უნიკალურობით, ცენტრალური და აღმოსავლეთ ევროპის ახალი პროექტების ჩემპიონის ტიტული მოიპოვა.