არაფერი არ აღელვებს მკითხველს ისე, როგორც თავისი საყვარელი წიგნის ეკრანიზაციის ბედი. იმ წუთიდან, როცა ვიგებთ, რომ უკვე ცნობილ და აღიარებულ ლიტერატურულ ნაწარმოებს ფილმად ან სერიალად იღებენ, არაერთგვაროვანი განცდები გვეუფლება. ერთი მხრივ, გვიხარია, რომ ისტორია ეკრანზე გაცოცხლდება, მაგრამ, მეორე მხრივ, გვეშინია, შედეგი უხეირო არ აღმოჩნდეს. სწორედ ასეთი შერეული გრძნობებით ველოდებით 2022 წლის რამდენიმე მნიშვნელოვან ფილმსა და სერიალს, რომელთა პირველწყაროც ჩვენთვის უკვე კარგად ნაცნობი წიგნებია.

1. აგათა კრისტის სიკვდილი ნილოსზე

ლეგენდარული ერკიულ პუაროს შესახებ დაწერილი საკულტო დეტექტივი 20th Century Studios-მა გადაიღო. ეკრანიზაციაში, რომელსაც მაყურებელი წლებია, ელოდება, კენეთ ბრანა, გალ გადოტი, როუზ ლესლი და ტომ ბეიტმანი მონაწილეობენ. ფილმი 11 თებერვალს გამოვა.

2. დელია ოუენსის იქ, სადაც კიბორჩხალები მღერიან

დელია ოუენსმა თავისი სადებიუტო რომანი 70 წელს მიტანებულმა დაწერა. წიგნი 2018 წელს გამოვიდა და მას შემდეგ ბესტსელერების სიაში მოწინავე პოზიციებს არ თმობს. აქამდე რომანის 12 მილიონზე მეტი ეგზემპლარია გაყიდული. ჩრდილოეთ კაროლინაში მცხოვრები, "მარშის გოგოდ" ცნობილი კაიას ისტორიას მაყურებელი ეკრანზე 22 ივლისს იხილავს. ფილმში მთავარ როლებს დეიზი ედგარ-ჯონსი, ტეილორ ჯონ-სმითი და ჰარის დიკსონი ასრულებენ.

3. სტივენ კინგის სალემის ლოტი

საშინელებათა ჟანრის მეფედ წოდებული სტივენ კინგის ეს რომანი, რომელიც ვამპირებზე შექმნილი ლიტერატურის კლასიკადაა ქცეული, სულ მალე ქართულადაც გამოვა. 1975 წელს გამოცემული ნაწარმოების მიხედვით რამდენჯერმე შექმნეს კინო, რადიო და სატელევიზიო ადაპტაციები. კიდევ ერთი კინოეკრანიზაცია, სადაც მთავარ როლებს სპენსერ ტრიტ-კლარკი, უილიამ სედლერი და ელფრი ვუდარდი ასრულებენ, წლევანდელი წლის 9 სექტემბერს გამოვა.

4. როალდ დალის მატილდა

საბავშვო ლიტერატურის კლასიკოსის, როალდ დალის, ეს რომანი უკვე გადაიღეს არანაკლებ ცნობილ ფილმად. ეს ეკრანიზაცია იმდენად უნაკლო იყო, რომ როცა ახალი ადაპტაციის შესახებ შევიტყვეთ, ცოტათი შევშფოთდით კიდეც. თუმცა, ნეტფლიქსის კინომიუზიკლში მის ტრანჩბულის როლს, არც მეტი, არც ნაკლები, ემა თომპსონი შეასრულებს, ამიტომ, სანერვიულო ნაკლებად გვაქვს. მიუზიკლს მაყურებელი წლის მიწურულს, დეკემბერში იხილავს.

5. სალი რუნის საუბრები მეგობრებთან

ირლანდიელი მწერლის სადებიუტო რომანი 2017 წელს გამოიცა, თუმცა, მისი ავტორი უფრო პოპულარული მეორე წიგნით, ჩვეულებრივი ადამიანები, გახდა, რომელიც წარმატებულ სერიალად იქცა. მინისერიალადაა ჩაფიქრებული საუბრები მეგობრებთან, რომელიც სულ 12 სერიას მოიცავს. BBC-ის ეკრანიზაციაში ელისონ ოლივერი, ჯო ელვინი, ჯემაიმა კირკი და საშა ლეინი მონაწილეობენ. სერიალს გაზაფხულზე, სავარაუდოდ, მარტის ან აპრილის თვეში ვიხილავთ.

6. ჯესიკა ნოლის ყველაზე იღბლიანი გოგო

ნაწილობრივ საკუთარ გამოცდილებაზე დაფუძნებული თრილერი დებიუტანტმა ავტორმა, ჯესიკა ნოლმა, 2015 წელს გამოსცა. წიგნი The New York Times-ის ბესტსელერი გახდა. რაც შეეხება ეკრანიზაციას, ნეტფლიქსის ფილმში მთავარ როლებს მილა კუნისი, ფინ უიტროკი და კონი ბრიტონი მოირგებენ. გადაღებები გასულ წელს დასრულდა, თუმცა, კინოადაპტაციის გამოსვლის ზუსტი თარიღი ჯერჯერობით უცნობია.

7. ჯეინ ოსტინის გონების ხმა

ინგლისელი მწერლის ბოლო დასრულებული რომანი ბევრისთვის ოსტინის ყველაზე საყვარელი ნაწარმოებია. რამდენჯერმე გადაიღეს წიგნის სატელევიზიო და რადიო ადაპტაცია, მის მიხედვით დაიდგა სპექტაკლებიც. მათ მალე მიემატება ნეტფლიქსის ფილმიც, სადაც ენ ელიოტის როლს დაკოტა ჯონსონი მოირგებს, მისტერ ელიოტს კი ჰენრი გოლდინგი განასახიერებს. ეკრანიზაციის გამოსვლის თარიღი კვლავაც უცნობია.

8. სომან ჩაინანის სკოლა კეთილისა და ბოროტისა

ამერიკელი ავტორის, სომან ჩაინანისთვის, სადებიუტო რომანი იყო სკოლა კეთილისა და ბოროტისა, რომელიც გამოცემიდან მალევე იქცა ბესტსელერად, ითარგმნა 30 ენაზე და გაიყიდა 3 მილიონზე მეტ ეგზემპლარად. საბავშვო ფენტეზის ეკრანიზაციაში მთავარ როლებს შარლიზ თერონი, მიშელ იოუ და ლოურენს ფიშბერნი ასრულებენ. ნეტფლიქსის ამ ფილმის გამოსვლის თარიღი ასევე არ არის ცნობილი.