სულ ცოტა ხნის წინ ციფრული აუდიო სტრიმინგ პლატფორმა Spotify-დან თავისი მუსიკის წაშლა ცნობილმა კანადელმა მომღერალმა და კომპოზიტორმა, ჯონი მიჩელმა, მოითხოვა. მან თავის ვებსაიტზე გამოქვეყნებულ წერილში ახსნა, რომ მიზეზი პლატფორმაზე ცრუ ინფორმაციების გავრცელებაა.

მიჩელი პირველი არ არის, ვინც მსგავსი გადაწყვეტილება მიიღო. ცნობილი პლატფორმიდან თავისი შემოქმედების წაშლა იმავე მიზეზით მოითხოვა კიდევ ერთმა კანადელმა მუსიკოსმა, ნილ იანგმაც.

მიჩელისა და იანგის მოთხოვნა პოდკასტერ ჯო როგანის განცხადებებს უკავშირდება. Spotify-ის ყველაზე პოპულარულ პოდკასტში კორონავირუსის ვაქცინაზეც ისაუბრეს, ამ დეზინფორმაციამ კი, იანგის თქმით, ადამიანების სიკვდილიც შეიძლება გამოიწვიოს.

"შეუძლიათ ან როგანი ჰყავდეთ, ან იანგი. ორივე ვერ გამოვა", — განაცხადა მუსიკოსმა.

"მხარს ვუჭერ ნილ იანგს", — ასეთი სათაური აქვს ჯონი მიჩელის წერილს.

"გადავწყვიტე, Spotify-დან მთელი ჩემი შემოქმედება წავშალო", — წერს მიჩელი, — "უპასუხისმგებლო ხალხი სიცრუეს ავრცელებს, რაც სხვებს სიცოცხლის ფასად უჯდებათ. მხარს ვუჭერ ნილ იანგს და ამ საკითხთან დაკავშირებულ მსოფლიო სამეცნიერო და სამედიცინო საზოგადოებებს".

წინა კვირას პლატფორმიდან იანგის მუსიკა ოფიციალურად წაიშალა, რასაც Spotify-ის განცხადებაც მოჰყვა.

"ჩვენ გვინდა, რომ მთელი მსოფლიოს მუსიკალური და აუდიო კონტენტი ჩვენი მომხმარებლისთვის ხელმისაწვდომი იყოს. ამას მოჰყვება დიდი პასუხისმგებლობაც, რომ დავიცვათ ბალანსი მსმენელის უსაფრთხოებასა და შემქმნელების თავისუფლებას შორის. კონტენტთან დაკავშირებული პოლიტიკა დეტალურად გავწერეთ და პანდემიის დაწყების შემდეგ კორონავირუსთან დაკავშირებული 20 ათასზე მეტი პოდკასტიც წავშალეთ. ვწუხვართ, რომ ნილმა პლატფორმიდან თავისი მუსიკისწაშლის გადაწყვეტილება მიიღო, მაგრამ, ვიმედოვნებთ, მალე დაგვიბრუნდება".

Spotify-ის ამ განცხადების მიუხედავად, აღსანიშნავია, რომ მათ როგანს $100 მილიონი გადაუხადეს, რათა მისი პოდკასტი ექსკლუზიურად ყოფილიყო განთავსებულიყო ამ პლატფორმაზე. პოდკასტს, რომელიც გაერთიანებული სამეფოს, აშშ-ისა და ავსტრალიის ჩარტებში მოწინავე პოზიციებს იკავებს, 381 მილიონი მსმენელი და 172 მილიონი გამომწერი ჰყავს.

ცოტა ხნის წინ საზოგადოებრივი ჯანდაცვის ექსპერტებმა Spotify-ის ღია წერილით მოუწოდეს, როგანის პოდკასტზე რეაგირება მოეხდინა. ექსპერტები აღნიშნავენ, რომ როგანი ხშირად ავრცელებდა დეზინფორმაციას, განსაკუთრებით კორონავირუსის პანდემიასთან დაკავშირებით. მის ერთ-ერთ პოდკასტში სტუმარი ამტკიცებდა, "საავადმყოფოები გარდაცვლილების სიკვდილის მიზეზად კორონავირუსის დასახელებისთვის ფულს იღებენ", ხოლო "მსოფლიო ლიდერებმა საზოგადოება ვაქცინაციის მხარდასაჭერად დააჰიპნოზეს".

თუმცა, ჯო როგანის პოდკასტი მხოლოდ პანდემიასთან დაკავშირებულ დეზინფორმაციას არ ავრცელებს. რამდენიმე დღის წინ მასთან სტუმრად იყო კანადელი ფსიქოლოგი ჯორდან პიტერსონი, რომელმაც განაცხადა, რომ კლიმატის მომავლის ზუსტი წინასწარმეტყველება შეუძლებელია, რადგან მოდელირება დროის ხანგრძლივ პერიოდზე რთულია. ამ განცხადებისთვის პიტერსონიც და როგანიც კლიმატის ცვლილების მკვლევრებმა გააკრიტიკეს და აღნიშნეს, რომ პიტერსონს "მეცნიერების არაფერი გაეგება", ხოლო ეს საუბარი შეცდომაში შემყვანი "გაუგებარი აბდაუბდა" იყო.