მას შემდეგ, რაც 2020 წელს დადასტურდა, რომ საკულტო ლათინურ-ამერიკული სერიალი ფარული ვნება გაგრძელდებოდა, ქართველი მაყურებელი მოუთმენლად ელოდა სიახლეებს მეორე სეზონთან დაკავშირებით.

ჩვენ აქამდე უკვე ვიხილეთ პირველი კადრები შოუს გაგრძელებიდან და შეგვეძლო, პირველადი შთაბეჭდილებები შეგვექმნა. Telemundo-მ უკვე სრული ოფიციალური ტრეილერიც გამოაქვეყნა და პრემიერის ზუსტი დროც გაგვიმხილა: 14 თებერვალი.

თითქმის ორწუთიან ვიდეოში ერთგული მაყურებლებისთვის კარგად ნაცნობი სახეები ჩნდებიან (მაგალითად, მარიო ჩიმარო და დანა გარსია), ამავდროულად კი სრულიად უცხო მსახიობებსაც მოკრავთ თვალს, რაც იმას ნიშნავს, რომ ახალ პერსონაჟებსაც გავიცნობთ.

ტრეილერი საპნის ოპერისთვის დამახასიათებელ დრამატულ მოვლენებს გვპირდება: ჩვენთვის ნაცნობი გმირების ცხოვრებაში ტრაგედია დატრიალდება.

დანარჩენი რა სალაპარაკოა, ისღა დაგვრჩენია, უკანასკნელი დღეები ავითვალოთ და 18 წლის შემდეგ საყვარელ გმირებს ისევ შევხვდეთ.