თბილისი-მოსკოვი-თბილისის მიმართულებით ჯორჯიან ეარვეისმა პირდაპირი ფრენა ჩანიშნა, თუმცა რამდენიმე წუთის წინ კომპანიამ პოსტი Facebook-გვერდიდან აიღო. ჯორჯიან ეარვეისი სოციალურ ქსელში მომხმარებლებეს პასუხობდა, რომ პირდაპირი ავიარეისი 28 იანვარს შესრულდება, ხოლო რეგულარული ავიარეისები თბილისი-ერევანი-მოსკოვის მიმართულებით, პარტნიორ ავიაკომპანიასთან თანამშრომლობით ხორციელდება.

ფოტო: On.ge

როგორც ჯორჯიან ეარვეისში On.ge-ს განუცხადეს, ეს ერთჯერადი, ჩარტერული ავიარეისია და მსგავსი აქამდეც შესრულებულა.

ამასთან, რუსეთის ფედერაციასთან ურთიერთობის საკითხებში საქართველოს პრემიერმინისტრის სპეციალურმა წარმომადგენელმა, ზურაბ აბაშიძემ On.ge-ს უთხრა, რომ ოფიციალურად პირდაპირი ფრენები არ აღდგენილა, ხოლო რა ავიარეისზეა საუბარი, ამას გაარკვევს.

ეკონომიკის სამინისტროში On.ge-ს განუცხადეს, რომ საქართველოსა და რუსეთს შორის რეგულარული საჰაერო მიმოსვლა არ აღდგენილა. მათი თქმით, 28 იანვარს დანიშნული თბილისი-მოსკოვი-თბილისის ფრენა წარმოადგენს ერთჯერად ჩარტერულ რეისს, რომლის შესრულებაც შესაბამისი უწყებების მხრიდან რაიმე გამონაკლისის დაშვებას არ საჭიროებს, რადგან საუბარია არა რეგულარულ, არამედ ერთეულ ჩარტერულ რეისზე.

"ავიაკომპანია Georgian Airways-ის მიერ წარმოდგენილი ფრენის განაცხადის შესაბამისად, დაგეგმილი ფრენა მიზნად ისახავს ბიზნესის წარმომადგენლების ტრანსპორტირებას ორივე მიმართულებით, რაზეც მასზე გაიცა ერთჯერადი ნებართვა ორივე ქვეყნის საავიაციო ხელისუფლების მიერ", — აცხადებენ უწყებაში.

რუსეთმა საქართველოს ე.წ. ტურისტული ემბარგო 2019 წლის 8 ივლისიდან, 20 ივნისის მოვლენების შემდეგ დაუწესა. ამ დღეს საქართველოში მოქალაქეების პროტესტი საქართველოში რუსი დეპუტატების ჩამოსვლას მოჰყვა.